ផលិតកម្ម បុប្ផា ថត MV ជាង ៨០ បទ ត្រៀមលក់រដូវចូលឆ្នាំ

Posted by Unknown Posted on 07:38 with No comments

យ៉ាងហោចណាស់មានបទចម្រៀងចំនួន ៨០ បទ ក្នុងនោះមាន បទថ្មីជាង ៥០ បទ ត្រូវបានផលិតកម្ម បុប្ផា ថតវីដេអូខារ៉ាអូខេ កាលពីម្សិលមិញ ដើម្បីត្រៀមចេញលក់ក្នុងរដូវចូលឆ្នាំខាងមុខនេះ។
បើតាមការឲ្យដឹងពី លោក ឡោ កុសល អ្នកដឹកនាំក្នុងការថតនេះ បទចម្រៀងទាំង ៨០ បទ នេះ នឹងត្រូវចែកចេញជា ៤ វ៉ុល ដែលសុទ្ធសឹងតែជាបទតម្រូវរដូវចូលឆ្នាំប្រពៃណីខ្មែរ មានដូចជា រាំវង់ រាំក្បាច់ សាន់វ៉ាន់ ឡាំលាវ កន្ទ្រឹម ជាដើម។ ផលិតកម្មបុប្ផា បានប្រើពេលតែ ១ ថ្ងៃ ប៉ុណ្ណោះ ក្នុងការថតបទចម្រៀងទាំងអស់នេះ ដែលចាប់ផ្ដើមតាំងតែពីម៉ោង ៨ ព្រឹក រហូត ដល់ម៉ោង ៤ ទាបភ្លឺ ក្នុងទីអារាមមួយ នៅសង្កាត់ ស្ទឹងមានជ័យ។
ការថតបទចម្រៀងច្រើនប្រើពេលតែ១ថ្ងៃ មិនមែនជារឿងថ្មីឡើយ ជារៀងរាល់ឆ្នាំផលិតកម្មបុប្ផា ក៏ដូចជា ផលិតកម្មក្នុងស្រុកមួយចំនួនទៀត ក៏ធ្វើរបៀបនេះដូចគ្នា។ លោក ឡោ កុសល បានលើកឡើងថា តារាសម្ដែង ក៏ដូចជា តារាចម្រៀងមិនសូវមានពេលគ្រប់គ្រាន់ឲ្យឡើយ ទម្រាំណាត់បានមកថត ក្រុមការងាររបស់លោកបានប្រើពេលជាង ១ ខែ ដើម្បីអញ្ជើញមកចូលរួម។
លោក កុសល បានឲ្យដឹងទៀតថា ទាំងតារាចម្រៀងក៏ដូចជាតារាសម្ដែងរាំអមឆាក មានរហូតដល់ទៅជិត ១០០ នាក់ ត្រូវបានផលិតកម្មរបស់លោកអញ្ជើញមក។
ផលិតកម្មបុប្ផា ជាផលិតកម្មមួយ ត្រូវបានគេស្គាល់ថា ជាផលិតកម្មខ្មែរនៅក្រៅប្រទេស ដែលមាន កញ្ញា ឡោ បុប្ផា ជាចាងហ្វាង ។ កន្លងមកមានផលិតកម្មខ្មែរក្នុងស្រុក និង ក្រៅស្រុកច្រើនណាស់បង្កើតឡើង ប៉ុន្តែក្រោយមកក៏បិទទ្វារទៅវិញ ដោយសារតែការផលិតគ្មានគុណភាព និង មានការលូចចម្លងច្រើន។
លោក បានបញ្ជាក់ថា មូលហេតុដែលនាំឲ្យផលិតកម្មមួយបិតទ្វាក៏ព្រោះតែបទចម្រៀងដែលផលិតហើយ ត្រូវបានជនខិលខូចចម្លងយកទៅលក់បន្ត ហើយដាក់លក់ ក្នុងតម្លៃថោក។ អ្នកដឹងនាំសម្ដែងរូបនេះបានលើកឡើងថា កុំថាឡើយនៅក្នុងស្រុក សូម្បីតែនៅអាមេរិកក៏ មានCD Copy ដែរ ដោយជនខិលខូចទាំងនោះ យកទៅលក់តាមផ្ទះបងប្អូនខ្មែរតែម្ដង ដោយគេលក់តែ១បន្ទះ គឺពី១-២ ដុល្លារ ប៉ុណ្ណោះ ខណៈដែល CD Original មានតម្លៃដល់ទៅ ៥ ដុល្លារក្នុងមួយបន្ទះ។ ជាមួយគ្នានោះដែរ YouTube ក៏ជាចំណុចដែលនាំឲ្យផលិតកម្មក្ស័យធនដែរ ព្រោះអ្នកទិញបានយកទៅចម្លងចូល ដូចនេះអតិថិជនដែលធ្លាប់ទិញ លែងទិញ បែរជាចាំមើល តាម YouTubeទៅវិញ។
ទោះបែបនេះក្ដី ដើម្បីសិល្បៈ ទំនៀមទម្លាប់ប្រពៃណីខ្មែរ ផលិតកម្មបុប្ផា នៅតែមានឆន្ទៈ បន្តការងាររបស់ខ្លួន រហូតដល់ដំណាក់កាលចុងក្រោយ។ ក្នុងនោះដែរ លោកសូមសំណូមពរ អតិជនទាំងអស់ មេត្តាជួយ ទិញ CD Original របស់ផលិតកម្មបុប្ផា ដើម្បីឲ្យផលិតកម្មចាស់វស្សាមួយនេះ អាចឈរជើងបម្រើអារម្មណ៍ទស្សនិកជនបន្តទៀត ៕
សូមទស្សនារូបភាព តារាប្រុស-ស្រី ចាស់ និង ថ្មី ដែលបានចូលរួមថត MV ឲ្យផលិតកម្ម បុប្ផា កាលពីម្សិលមិញនេះ។