វិនិយោគិនម៉ាឡេស៊ី បោះទុនវិនិយោគលើវិស័យសណ្ឋាគារនៅកម្ពុជា
រាជធានីភ្នំពេញ ៖ ដោយសម្លឹងឃើញពីកំណើនសេដ្ឋកិច្ច និងសក្តានុពលដ៏ល្អនៃវិស័យទេសចរណ៍នៅកម្ពុជា លោកស្រី HGUI IngIng វិនិយោគិនជនជាតិម៉ាឡេស៊ី បានសម្រេចបោះទុនវិនិយោគសណ្ឋាគារដ៏ប្រណីតមួយឈ្មោះថា សណ្ឋាគារ Lance Court ដែលមានទីតាំងនៅផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ ។
សណ្ឋាគារមួយនេះបានបើកសម្ពោធជាផ្លូវការកាលពីថ្ងៃទី២៦ មករា ដោយមានការចូលរួមជាអធិបតីពីសំណាក់លោក ប៉ាក់ សុខុម រដ្ឋលេខាធិការក្រសួងទេសចរណ៍កម្ពុជា លោក តីករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រី និងជាម្ចាស់ក្រុមហ៊ុនអាកាសចរណ៍កម្ពុជាអង្គរអ៊ែរ លោក Datuk Amar AbangJohari Bin TunAbangOpeng រដ្ឋមន្ត្រីក្រសួងទេសចរណ៍នៃរដ្ឋសារ៉ាវាក់ ប្រទេសម៉ាឡេស៊ី លោក DatuIkPahonAnakJoyik លេខាធិការអចិន្ត្រៃយ៍របស់រដ្ឋមន្ត្រីក្រសួងទេសចរណ៍នៃរដ្ឋសារ៉ាវាក់ ប្រទេសម៉ាឡេស៊ី ។
លោកស្រី HGUI IngIng ម្ចាស់សណ្ឋាគារ Lance Courtបានឱ្យដឹងថា ដោយផ្អែកលើភាពឥតខ្ចោះនៃសម្រស់ទេសចរណ៍និងសក្តានុពលភាពលើបរិយាការសង្គមនិងសេដ្ឋកិច្ចរីកចម្រើនរបស់កម្ពុជា សណ្ឋាគារ Lance Courtត្រូវបានបង្កើតឡើងដើម្បីបម្រើដល់សេវាកម្មស្នាក់នៅជូនភ្ញៀវទេសចរដោយមានការសហការគ្នាជាមួយអ្នកជំនួញប្រទេសម៉ាឡេស៊ីនិងកម្ពុជា។ សណ្ឋាគារ Lance Courtគឺជាសណ្ឋាគារដំបូងគេដែលមានការតុបតែងស្អាតប្លែកនិងមានខ្យល់អាកាសបរិសុទ្ធជិតទន្លេ ដោយមានចំនួន៥២បន្ទប់បែងចែកជាច្រើនប្រភេទ ដែលបន្ទប់នីមួយៗបានបំពាក់ជាមួយគ្រឿងអេឡិចត្រូនិកទំនើបៗ។ ក្នុងនោះទ្វារបន្ទប់ទាំងអស់ត្រូវបានបំពាក់ជាមួយប្រព័ន្ធបើកទ្វារស្វ័យប្រវត្តិដោយប្រើកាត (Automatic Smart Card System) រួមជាមួយអ្នកទទួលភ្ញៀវដែលចេះភាសាអង់គ្លេសបានល្អនិងសុភាពរាបសាដែលទទួលបានការហ្វឹកហាត់បានយ៉ាងល្អ ។
នៅក្នុងឱកាសអបអរសាទរជាមួយការសម្ពោធថ្មីនេះ សណ្ឋាគារ Lance Court ក៏មានកម្មវិធីពិសេសជូនដល់អតិថិជនដែលចូលមកស្នាក់នៅផងដែរ ដែលមានបន្ទប់តម្លៃចាប់ពី20$-35$ ៕
ប្រភពពី ៖ ចន្ទ្រគ្រាស
0 ความคิดเห็น:
แสดงความคิดเห็น