សុគន្ធ នីសា ស្លៀកខោរឹបបង្ហាញភាពសិចស៊ីខ្លាំងចម្លែកភ្នែកសម្រាប់អ្នកគាំទ្រ ខ្លះរិះគន់ ខ្លះការពារ
រាជធានីភ្នំពេញ ៖ តារាចម្រៀងស្រគត់ស្រគំ នាងសុគន្ធ នីសា បានធ្វើឲ្យមានការភ្ញាក់ផ្អើលយ៉ាងខ្លាំងតាមហ្វេសប៊ុក បន្ទាប់ពីរូបភាពរបស់នាងត្រូវគេបង្ហោះក្នុងឈុតស្លៀកខោរឹបរាងខ្លាំង ដែលមើលទៅសិចស៊ីមិនសមភ្នែក ។
នេះជាលើកទីមួយហើយសម្រាប់តារាចម្រៀងមនោសញ្ចេតនា និងស្រគត់ស្រគំនាងសុគន្ធ នីសា ដែលត្រូវមហាជនរិះគន់ទៅលើផ្នែកសម្លៀកបំពាក់ ខណៈពេលដែលកន្លងមកនាងត្រូវគេស្ងើចសរសើរចំពោះអាកប្បកិរិយា និងឫកពារម្យទម ។
ទំព័រហ្វេសប៊ុកបុរសម្នាក់កាលពីពេល ថ្មីៗនេះបានបង្ហោះរូបភាពរបស់សុគន្ធ នីសា ក្នុងឈុតសម្លៀកបំពាក់ពណ៌ក្រហមដែល ទំនងជាមុនឡើងឆាកប្រគំតន្ត្រីក្នុងកម្មវិធីណាមួយ។ បុរសនេះបានសម្តែងការហួសចិត្តពេលឃើញរូបភាពតារាដែលខ្លួនគាំទ្រ ធ្លាប់ស្លៀកពាក់សមរម្យខុសពីតារាដទៃដែលចូលចិត្តបែបសិចស៊ីបែរជាស្លៀកពាក់បែបនេះទៅវិញ ។
បុរសម្នាក់នោះសរសេរថា «អស់ជំនឿក្នុងការគាំទ្រនៅពេលឃើញស្លៀកពាក់មិនសម្យជានារីខ្មែរ ជាពិសេសជាតារាដែលខ្ញុំតែងតែសរសើរថា សុភាពរាបសាជាយូរណាស់មកហើយ» ។
ទោះជាយ៉ាងណាក្តី ទន្ទឹមនឹងការរិះគន់មួយចំនួនក៏មានប្រិយមិត្តមួយចំនួនការពារសុគន្ធ នីសា ។ អ្នកការពារបានសម្តែងការមិនពេញចិត្តចំពោះមតិរិះគន់ទាំងនោះឡើយ ខណៈពេលអ្នកមួយចំនួនសង្ស័យថា រូបភាពនោះជាការលួចកែកុនបន្ថែម ពីមនុស្សដែលមិនចូលចិត្តនាង ។
ទំព័រហ្វេសប៊ុករបស់នារីម្នាក់បានសម្តែងមតិទៅលើការរិះគន់រូបថត សុគន្ធ នីសា ថា «អ្នករិះគន់ចាំតែរិះគន់ពេកហើយ...អ្នកណាៗក៏ដឹងដែរទូទាំងប្រទេសថាគាត់ជាតារាចម្រៀងដែលសុភាពរាបសាជាងគេ មិនដែលមានព័ត៌មានរឿងស្លៀកពាក់មិនសមរម្យទេ សូម្បីឡើងទទួលពានអាណាចក្រតារាក៏គាត់នៅតែសុភាពជាងគេដែរ ហើយវាធម្មតាទេដំរីជើង៤វាគង់មានភ្លាត់ ។ គាត់ធ្វើតារាចម្រៀងកេរ្តិ៍ឈ្មោះល្អរាប់ឆ្នាំហើយកុំព្រោះតែរឿងតិចតួចប៉ុណ្ណឹងរិះគន់គាត់ វាជាសម្លៀកបំពាក់ក្នុងរូបភាពអចេតនាទេ វាមិនមែនជាសម្លៀកបំពាក់ដែលតាំងចិត្តថានឹងបញ្ហាញទេ ។ ខ្ញុំក៏ធ្លាប់មានខោ អីុចឹងៗដែរ មានតែអ្នកប្រើវាទេទើបយល់ យើងគ្មានចេតនានឹងបង្ហាញ ពេលដែលដាក់នៅលើម៉ាឡាកាំង នៅលើកាតាឡុកវាឃើញថាសមរម្យទើបមិនចាប់អារម្មណ៍ ពេលយកមកស្លៀកទើបដឹងថាវាយ៉ាងម៉េច ហើយបើសិននៅក្នុងកាលៈទេសៈមួយដែលប្រញាប់ យើងបង្ខំចិត្តត្រូវតែពាក់វា ។ មានតែអ្នកធ្លាប់ជួបរឿងបែបនេះទើបយល់ ហើយគាត់ថ្លោះធ្លោយប៉ុណ្ណឹងវាមិនដល់ថ្នាក់ថ្កោលទោសគាត់ដល់ថ្នាក់ហ្នឹងទេ ។ យ៉ាងណាក៏គាត់បម្រើអារម្មណ៍អ្នករិះគន់ហ្នឹងមករាប់ឆ្នាំដែរហើយ ។ ខ្ញុំមិនមែន «ហ្វែន» គាត់ទេ តែខ្ញុំវែកញែកតាមភាពជាក់ស្ដែង» ។
ទាក់ទងបញ្ហានេះកោះសន្តិភាពមិនអាចស្វែងរកការបកស្រាយបំភ្លឺណាមួយពីនាងសុគន្ធ នីសា បានឡើយ ម្យ៉ាងតារាចម្រៀងនៅក្នុងផលិតកម្មថោនរូបនេះកន្លងមកហាក់មិនសូវស្វាគមន៍អ្នកសារព័ត៌មានឡើយ ៕
ប្រភពពី៖ ៖ ចន្ទ្រគ្រាស
0 ความคิดเห็น:
แสดงความคิดเห็น