អាជ្ញាធរអប្សរាថ្កោលទោស រូបអាសអាភាសរបស់ស្ត្រីស្អាត ដែលថតនៅមុខប្រាសាទ
ខេត្តសៀមរាប ៖ អាជ្ញាធរជាតិអប្សរា កាលពីថ្ងៃទី២៤ ខែមករា ឆ្នាំ២០១៥ បានចេញសេចក្តីប្រកាសថ្កោលទោស ចំពោះរូបថតអាក្រាតពាក់កណ្តាលខ្លួន របស់ស្រីម្នាក់ឈរនៅមុខប្រាសាទ ដោយពិពណ៌នាថា ការថតបង្ហាញកាយអាក្រាតបែបនោះ ជាអំពើដែលប្រាសចាកផ្ទុយទាំងស្រុងពីសីលធម៌ និងវប្បធម៌ខ្មែរ ព្រមទាំងនាំអោយមាន ការអាប់អោនយ៉ាងធ្ងន់ធ្ងរដល់បេតិកភ័ណ្ឌជាតិ និងកិត្តិយសនារីភេទផងដែរ។
សេចក្តីប្រកាសព័ត៌មាននេះ បានធ្វើឡើងបន្ទាប់ពី មានការបង្ហោះរូបភាព បែបអាសអាភាសរបស់ស្រីម្នាក់នោះ ថតនៅមុខប្រាសាទ តាមរយៈបណ្តាញ ទំនាក់ទំនងសង្គមហ្វេសប៊ុក ក្នុងរយៈពេលប៉ុន្មានថ្ងៃ កន្លងមកនេះ។ រូបថតស្រីអាក្រាត ពាក់កណ្តាលកាយ ឈរនៅមុខប្រាសាទនោះ ធ្វើអោយមានរិះគន់ យ៉ាងខ្លាំងពីសំណាក់ប្រិយមិត្ត បណ្តាញសង្គមហ្វេសប៊ុកនិងបានលើក ជាសំណួរអំពីតួនាទី និងកតព្វកិច្ច របស់អាជ្ញាធរអប្សរា ផងដែរ។
នៅក្នុងសេចក្តីប្រកាសព័ត៌មាន ដដែលនោះ ក្រៅអំពីការបង្ហាញ នូវការថ្កោលទោស យ៉ាងខ្លាំងចំពោះរូបភាពនោះ អាជ្ញាធរជាតិអប្សរា ក៏បានប្តេជ្ញាថា នឹងធ្វើការស្រាវជ្រាវ រកការពិតព្រមទាំងប្តេជ្ញា អនុវត្តនីតិវិធីច្បាប់ តាមគ្រប់រូបភាព ដើម្បីធ្វើការផ្តន្ទាទោស ចំពោះការប្រព្រឹត្តបែបអាសអាភាស និងខ្វះការពិចារណាបែបនេះ។ អាជ្ញាធរជាតិអប្សរា ក៏បានធ្វើការអំពាវនាវដល់ជនរួមជាតិទាំងអស់ អោយចូលរួមសហការ ក្នុងការផ្តល់ព័ត៌មាន ជាតម្រុយដែលអាច នាំអោយរកឃើញការពិត ក្នុងករណីរូបភាពនោះ ដើម្បីលើកកម្ពស់កិត្យានុភាព នៃវប្បធម៌ខ្មែរដ៏រុងរឿងនៃយើង៕ ដោយ ច័ន្ទ សុភាព
ប្រភពពី៖ វត្តភ្នំ
0 ความคิดเห็น:
แสดงความคิดเห็น