ឃាត់ខ្លួនបុរសញៀនថ្នាំ ដែលចាប់រំលោភ សិស្សសាលា ៩នាក់ ពេលចេញពីរៀន
ខេត្តបន្ទាយមានជ័យ ៖ សមត្ថកិច្ចនគរបាល ខេត្ដបន្ទាយមានជ័យ បានស្រាវជ្រាវចាប់ខ្លួនជនល្មើសម្នាក់ ដែលតែងតែធ្វើសកម្មភាព ចាប់រំលោភ និងប៉ុនប៉ងរំលោភ លើក្មេងសិស្សសាលា ទាំងស្រីទាំងប្រុស ពេលចេញពីរៀន កាលពីវេលាម៉ោង ១២ ថ្ងៃត្រង់ ទី២៦ ខែមករា ឆ្នាំ២០១៥ នៅឃុំចំណោម ស្រុកមង្គលបុរី ។
ក្រោយពីនគរបាល ធ្វើតេស្ដទឹកនោមជនល្មើសរួច បានបង្ហាញលទ្ធផលថា មានសារធាតុញៀន ហើយបើចាប់ខ្លួន មិនបាននោះទេ នឹងធ្វើឱ្យមានវិប្បដិសារី ចំពោះក្មេងស្រី ក្មេងប្រុសទាំងឡាយ ដែលត្រូវបានជននេះ ប្រព្រឹត្ដនូវអំពើដ៏ថោកទាប ស្មោកគ្រោកបែបនេះ។ ប្រតិបត្ដិការ តាមចាប់ជនដៃដល់ ដែលបានធ្វើសកម្មភាព រំលោភសេពសន្ថវៈ លើក្មេងមិនទាន់គ្រប់អាយុ រហូតទៅដល់ ៩នាក់ ចាប់តាំងពីថ្ងៃទី៦ ខែមករា ឆ្នាំ២០១៥ បន្ទាប់ពីជននេះ បានប៉ុនប៉ង ចាប់រំលោភ ក្មេងស្រីសិស្សសាលាម្នាក់ទៀត មិនបានសម្រេច ស្ថិតនៅចំណុចទំនប់តាប៉ាង ប្រមាណ ១០០ ម៉ែត្រ ពីវិទ្យាល័យរោងគោ ខាងកើតភូមិតាប៊ុន ឃុំចំណោម ស្រុកមង្គលបុរី ។
មន្ដ្រីនគរបាលព្រហ្មទណ្ឌ បានបញ្ជាក់ថា ជនល្មើសមានឈ្មោះមឿន សេត ហៅ ក្រឹម អាយុ ២១ឆ្នាំ រស់នៅភូមិតាសល់ ឃុំចំណោម ស្រុកមង្គលបុរី។ នៅវេលាម៉ោង ១១ព្រឹក ថ្ងៃទី២៦ ខែ មករា ឆ្នាំ២០១៥ ក្មេងស្រីរងគ្រោះទី៩ ឈ្មោះ លសវ អាយុ ១២ឆ្នាំ បានជិះកង់តែម្នាក់ឯង ចេញពីសាលាតាមផ្លូវលំ សំដៅទៅផ្ទះ លុះដល់ចំណុច ខាងកើតទំនប់តាប៉ាង ស្រាប់តែជនល្មើស ស្ទុះចេញពីក្នុងគុម្ពោធព្រៃ ដែលសម្ងំចាំទីនោះ ដេញតាមចាប់ ក្មេងស្រីរងគ្រោះ ហើយក្មេងស្រីរងគ្រោះ ដោយភ័យខ្លាំងពេក បានធាក់កង់យ៉ាងលឿន តែត្រូវជនល្មើសរត់ដេញទាន់ រួចក៏ចាប់ដៃចូលទៅក្នុងព្រៃ ប៉ងចាប់រំលោភ។
ពេលនោះក្មេងស្រីរងគ្រោះ បានស្រែកអង្វរ សុំទៅយកទ្រនាប់ជើង ដែលជ្រុះតាមផ្លូវ ហើយពេលជនល្មើសលែងដៃ ក្មេងស្រីរងគ្រោះ បានរត់យ៉ាងលឿន ចោលកង់ចោលសៀវភៅ និងស្រែកឱ្យគេជួយ ទើបជនល្មើស មិនហ៊ានទៅតាម ក៏គេចខ្លួនមួយរយៈ ។ តាមរយៈពាក្យបណ្ដឹង របស់លោក លី វ៉ាន់ ត្រូវជាឪពុកក្មេងស្រីរងគ្រោះ ស្នងការនគរបាល ខេត្ដបន្ទាយមានជ័យ បានបញ្ជាឱ្យការិយាល័យជំនាញ សហការជាមួយ នគរបាលស្រុកមង្គលបុរី បើកការស្រាវជ្រាវ ក្នុងរយៈពេលប៉ុន្មានម៉ោងក្រោយមក ក៏ឈានទៅចាប់ខ្លួន ជនដៃដល់បានដោយជោគជ័យ ។
នៅចំពោះមុខសមត្ថកិច្ច ជនសង្ស័យ បានសារភាពថា រូបគេធ្លាប់បានចាប់រំលោភ ក្មេងស្រីម្នាក់ កាលពីរសៀលថ្ងៃទី៦ ខែមករា ឆ្នាំ២០១៥ ស្ថិតនៅ ខាងលិចវត្ដដងត្រាង ចម្ងាយ ១៦០ម៉ែត្រ ក្នុងភូមិដងត្រាង ឃុំចំណោម ព្រមទាំងបានចាប់រំលោភ និងប៉ុនប៉ងរំលោភ លើក្មេងប្រុសស្រីផ្សេងទៀត សរុបទាំងអស់ចំនួន ៩ នាក់។ ក្រោយពីការឃាត់ខ្លួន សមត្ថកិច្ចបានដក ហូត ម៉ូតូមួយគ្រឿង ម៉ាកសេ១២៥ ស៊េរី២០០៥ ពណ៌ខ្មៅ ដែលតែងតែ ជិះធ្វើសកម្មភាពចាប់រំលោភក្មេងប្រុស្រី ពេលចេញពីសាលារៀន៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น