ជិះម៉ូតូលឿនបុកសត្វគោដើរឆ្លងថ្នល់របួសធ្ងន់២នាក់ ក្នុងនោះម្នាក់ជានិស្សិតពាណិជ្ជកម្ម
ខេត្តកំពង់ឆ្នាំង៖ យុវជន និងយុវនារី២នាក់បានរងរបួសធ្ងន់ ដោយសារជិះម៉ូតូបុកសត្វគោដើរឆ្លងថ្នល់ជាតិ កាលពីវេលាម៉ោង១១ និង១០នាទីព្រឹក ថ្ងៃទី៣០ មករា ២០១៥ លើផ្លូវជាតិលេខ៥ ស្ថិតនៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ។
ប្រជាពលរដ្ឋនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញជនរងគ្រោះទាំង២នាក់បានជិះម៉ូតូម៉ាកហុងដាឌ្រីម ពណ៌ខ្មៅ ស៊េរី២០០៥ ពណ៌ខ្មៅ ក្នុងល្បឿនយ៉ាងលឿនតាមបណ្តោយផ្លូវជាតិ ក្នុងទិសដៅពីជើងទៅត្បូង លុះពេលមកដល់កន្លែងកើតហេតុស្រាប់តែមានសត្វគោឈ្មោល១ក្បាលដើរឆ្លងកាត់ពីកើតទៅលិច ដោយសារម៉ូតូមានល្បឿនលឿនពេកក៏បានបុកគោពេញទំហឹង បណ្តាលឱ្យពួកគេដួលបោកក្បាលនឹងថ្នល់ជាតិទាំង២នាក់បែកមួកសុវត្ថិភាព និងបែកក្បាលរ របួសធ្ងន់ធ្ងរតែម្តង ចំណែកម៉ូតូរបស់គេក៏ខូចខាតមួយកំណាត់មុខធ្ងន់ផងដែរ។
ក្រោយពេលកើតហេតុ ជនរងគ្រោះទាំង២នាក់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗដែរ ប៉ុន្តែយុវជនដែលជាអ្នកបើកម៉ូតូរងរបួសធ្ងន់ពេក ក្រុមគ្រួសារ និងពេទ្យបានបញ្ជូនទៅសង្គ្រោះបន្តនៅមន្ទីរពេទ្យក្រុងភ្នំពេញ។ ចំណែកយុវនារីរងគ្រោះកំពុងស្ថិតក្នុងការសង្គ្រោះរបស់គ្រូពេទ្យខេត្ត ដោយមិនទាន់ឃើញគ្រួសារមកមើលថែនៅឡើយទេ ។
សមត្ថកិច្ចមូលដ្ឋានបាននិយាយថា ជនរងគ្រោះជាអ្នកបើកម៉ូតូមានឈ្មោះ សុខ សំណាល់ អាយុប្រហែល២១ឆ្នាំ រស់នៅភូមិព្រៃខ្មែរ ឃុំរលាប្អៀរ ស្រុករលាប្អៀរ ជាសន្តិសុខវិទ្យុឯកជនមួយ នៅក្នុងក្រុងកំពង់ឆ្នាំង។ចំណែកនារីរងគ្រោះមានឈ្មោះអ៊ីន លក្ខណា ឆ្នាំកំណើត១៩៩៦ ជានិស្សិតពាណិជ្ជកម្ម រស់នៅក្នុងឃុំពង្រ ស្រុករលាប្អៀរ (ផ្អែកតាមអត្តសញ្ញាណបណ្ឌ័ជាប់ខ្លួន) ។
ដោយឡែកសត្វគោបង្កគ្រោះថ្នាក់ត្រូវបានប្រជាពលរដ្ឋចាប់ទុកប្រគល់ឱ្យសមត្ថកិច្ចប៉ុស្តិ៍នគរបាលមូលដ្ឋានរក្សាទុកជាមួយម៉ូតូជនរងគ្រោះ ដើម្បីកសាងសំណុំរឿងតាមផ្លូវច្បាប់ និងស្រាវជ្រាវរកម្ចាស់ដែលលែងគោឱ្យដើរអណាធិបតេយ្យមកទទួលខុសត្រូវចំពោះមុខច្បាប់ជាមួយជនរងគ្រោះ៕
ប្រភពពី៖ ផ្កាយព្រឹក
0 ความคิดเห็น:
แสดงความคิดเห็น