លោកស្នងការរង សៅ សាវ៉ាត ប្រើអំណាចចាត់តាំង សាច់ញាតិ និងបក្ខពួក ឲ្យកាន់តំណែងនិងប៉ុស្តិ៍ខ្លាញ់ ស្រួលរកលុយច្រកហោប៉ៅ
ខេត្តមណ្ឌលគិរី ៖ លោក សៅ សាវ៉ាត បច្ចុប្បន្នជាស្នងការរង ទទួលបន្ទុកការិយាល័យ ហិរញ្ញវត្ថុនិងភស្តុភារ នៃស្នងការដ្ឋាននគរបាល ខេត្តមណ្ឌលគិរី ត្រូវបានមន្ត្រីក្រោមឱវាទ រិះគន់យ៉ាងចាស់ដៃ ពីអំពើពុករលួយ កាលនៅកាន់តំណែងជាប្រធានការិយាល័យបុគ្គលិក ហើយចំណែកការប្រឡង ជ្រើសរើសក្របខណ្ឌមន្ត្រីនគរបាល កាលពីចុងឆ្នាំ២០១៤ កន្លងទៅថ្មីៗនេះវិញ គឺសុទ្ធសឹងតែមានការ រៀបចំទុកទាំងអស់ ពោលគឺបេក្ខជន ដែលដាក់ពាក្យប្រឡង បើមានលុយ ឬជាសាច់ញាតិ គឺប្រឡងជាប់ទាំងអស់ ដោយមិនខ្វល់ពីរឿងធ្លាក់ឡើយ។
ក្រុមមន្ត្រី ដែលសុំមិនបញ្ចេញឈ្មោះ បានឲ្យដឹងថា ពេលនៅកាន់ជា ប្រធានការិយាល័យបុគ្គលិក លោក សៅ សាវ៉ាត បានប្រព្រឹត្ត អំពើពុករលួយជាច្រើន ដូចជាតម្លើងឋាន្តរស័ក្តិ និងការចាត់ចែងប៉ុស្តិ៍ ដោយតម្លើងឋាន្តរស័ក្តិ និងប្រគល់ប៉ុស្តិ៍សំខាន់ៗ ឲ្យតែបក្ខពួក និងបងប្អូនសាច់ញាតិ របស់ខ្លួនតែប៉ុណ្ណោះ។ ក្នុងនោះ ប្រពន្ធរបស់លោក ក៏ដូចជាប្រពន្ធរបស់លោក ញ៉ែម វ៉ាន់នី ស្នងការនគរបាល ខេត្តមណ្ឌលគិរី ត្រូវលោកដាក់បញ្ចូល ក្នុងក្របខណ្ឌប៉ូលិស ដោយមានឋាន្តរស័ក្តិខ្ពស់ និងមិនដែលមកធ្វើការសោះ គឺឃើញយូរៗម្តងប៉ុណ្ណោះ។
ដោយឡែកប្អូនស្រី និងកូនប្រុស ដែលមានឈ្មោះ អាន ចាន់តុន និងឈ្មោះ ស៊ុន បញ្ញា ក៏ត្រូវបានលោក សៅ សាវ៉ាត ដាក់បញ្ចូល ទៅក្នុងក្របខណ្ឌ ជាមន្ត្រីនគរបាលជាតិ ខេត្តមណ្ឌលគិរីដែរ ដោយមិនដែលឃើញ មកធ្វើការនោះទេ ពោលគឺបច្ចុប្បន្នពួកគេ នៅរាជធានីភ្នំពេញ។ ក្នុងនោះដែរ បងប្អូនដែលជា សាច់ញាតិជាប់សាច់ឈាម មកពីស្រុកជាមួយគ្នា ក៏ត្រូវលោក សៅ សាវ៉ាត ដាក់បញ្ចូល និងមានតួនាទីល្អផងដែរ ដូចជាអធិការស្រុកពេជ្រាដា អធិការស្រុកកែវសីម៉ា ជាដើម ក្នុងនោះមិនទាន់ រាប់ទាំងមេប៉ុស្តិ៍ និងអនុប៉ុស្តិ៍ជាច្រើនទៀត ដូចជាប៉ុស្តិ៍ដាក់ដាំ ណាំលៀរ និងប៉ុស្តិ៍ឡាបាខេ គឺសុទ្ធសឹងតែជាបងប្អូន កូនក្មួយ ជីដូនមួយរបស់លោក សៅ សាវ៉ាត ទាំងអស់៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น