ជិះម៉ូតូលឿនដូចហោះកៀរគ្នាតាមផ្លូវ ជ្រុលបុកបង្គោលភ្លើង ស្លាប់ម្នាក់ របួសធ្ងន់ម្នាក់
ខេត្ដក្រចេះ ៖ បុរសម្នាក់ក្នុងចំណោម ២នាក់ បានស្លាប់យ៉ាងអាណោចអាធ័ម ពេលនាំទៅសង្គ្រោះ នៅមន្ទីរពេទ្យបង្អែកខេត្ដ និងម្នាក់ទៀតរងរបួសធ្ងន់ បន្ទាប់ពីជនរងគ្រោះ ទាំង ២នាក់ បានជិះម៉ូតូម៉ាកហុងដា ឌ្រីម យ៉ាងលឿន ហើយកៀរជាមួយម៉ូតូ ម៉ាកហុងដាស្គូពី ក៏រេចង្កូតទៅបុកនឹងបង្គោលភ្លើង កាលពីព្រឹកថ្ងៃទី២២ ខែមករា ឆ្នាំ២០១៥ នៅលើផ្លូវជាតិលេខ៧៣ ក្រចេះ-ឆ្លូង ចំណុចផ្លូវបំបែក មុខមន្ទីរពេទ្យបង្អែកខេត្ដ ក្នុងសង្កាត់ក្រចេះ ក្រុងក្រចេះ។
សមត្ថកិច្ចបានឲ្យដឹងថា ជនរងគ្រោះមានឈ្មោះ តូច ឡេងហួ អាយុ ២២ឆ្នាំ បានស្លាប់នៅមន្ទីរពេទ្យបង្អែកខេត្ដ និងអ្នករួមដំណើរ ម្នាក់ទៀតឈ្មោះ ហង្ស រ៉ាន្នី អាយុ ១៨ឆ្នាំ បានរងរបួសធ្ងន់ ជនរងគ្រោះទាំង ២នាក់ មានទីលំនៅ ក្នុងសង្កាត់រកាកណ្ដាល ក្រុងក្រចេះ។ សាក្សីបាននិយាយថា បុរសរងគ្រោះទាំង ២នាក់ បានជិះម៉ូតូម៉ាកហុងដាឌ្រីម ក្នុងទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុ បានកៀរនឹងម៉ូតូហុងដាស្គូពី ដែលកំពុងធ្វើ ដំណើរស្របទិសគ្នា។
ពេលនោះជនរងគ្រោះ បានរេចង្កូតទៅ បុកនឹងបង្គោលភ្លើង បណ្ដាលឱ្យជនរងគ្រោះថ្នាក់ ម្នាក់ស្លាប់និងម្នាក់ទៀត រងរបួសធ្ងន់។ សមត្ថកិច្ចនគរបាល ក្រុងក្រចេះ បានបញ្ជាក់ថា ក្រោយពីកើតហេតុ កម្លាំងជំនាញ បានចុះទៅវាស់វែង និងបាននាំជនរងគ្រោះ ទៅសង្គ្រោះនៅមន្ទីរពេទ្យបង្អែកខេត្ដ ហើយចំណែកម៉ូតូជនរងគ្រោះ បានយកទៅរក្សាទុក នៅការិយាល័យជំនាញបណ្ដោះអាសន្ន ។ រីឯម៉ូតូស្គូពី ក្រោយពីកើតហេតុ បានបន្ថែមល្បឿន ជិះរត់គេចខ្លួនបាត់ស្រមោល ៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น