មហាក្សត្រថ្មីអារ៉ាប៊ីសាអ៊ូឌីតសន្យាបន្តនយោបាយដែលមានស្រាប់
ព្រះមហាក្សត្រថ្មីអារ៉ាប៊ី សាអ៊ូឌីត សាល់ម៉ាន ប៊ីន អាប់ឌុល អាហ្ស៊ីសអាល់ សាអ៊ូដ សន្យាបន្តនយោបាយរបស់ព្រះមហាក្សត្រមុនអាប់ដាល់ឡាហ៍ ដែលចូលទិវង្គតកាលពីយប់ថ្ងៃទី២២ មក២៣មករា ។
ព្រះមហាក្សត្រថ្មីអង្គនោះសន្យាបែបនេះក្នុងសុន្ទរកថារបស់ព្រះអង្គតាមទូរទស្សន៍ពេលព្រះរាជាណាចក្រសំបូរប្រេងកាតនេះស្ថិតក្នុងដំណាក់កាលធ្វើបុណ្យព្រះសពរបស់ព្រះមហាក្សត្រដែលទើបសោយទិវង្គតក្រោយទ្រង់ដឹកនាំប្រទេសរយៈពេលជិត២ទសវត្សមក ។
ព្រះមហាក្សត្រសាល់ម៉ាន មានព្រះរាជបន្ទូលថា យើងនឹងបន្តនយោបាយដ៏ត្រឹមត្រូវដែលអារ៉ាប៊ីសាអ៊ូឌីតអនុវត្តពីដើមរៀងមក ។ ព្រះអង្គក៏ទ្រង់លើកឡើងផងដែរពីសភាពការណ៍ច្របូកប្រចល់នៅមជ្ឈឹមបូពា ដោយសារការរាលដាលនៃអំពើហិង្សារបស់ក្រុមរដ្ឋអ៊ិស្លាម ។ ព្រះអង្គបន្តថា អារ៉ាប់និងពិភពអ៊ិស្លាមត្រូវការជាបន្ទាន់នូវសាមគ្គីភាពនិងការរួបរួមគ្នា ។
ម្យ៉ាងវិញទៀត ព្រះមហាក្សត្រសាល់ម៉ាន ទ្រង់តែងតាំងអ្នកបន្តវេននាពេលអនាគតនិងជ្រើសតាំងមនុស្សមួយចំនួនសម្រាប់តំណែងគន្លឹះទាំងឡាយរបស់រដ្ឋាភិបាល ។ ទ្រង់បានជ្រើសតាំងក្មួយប្រុសព្រះអង្គម្ចាស់ម៉ូហាម៉េដប៊ីនណាយេវ រដ្ឋមន្ត្រីមហាផ្ទៃ ជារាជទាយាទទី២ ហើយជ្រើសតាំងចៅព្រះមហាក្សត្រស្ថាបនិកព្រះរាជាណាចក្របញ្ចូលក្នុងខ្សែរាជទាយាទជាលើកដំបូងដែរ ។ ទ្រង់ក៏លើកព្រះបុត្រាព្រះអង្គម្ចាស់ម៉ូហាម៉េដប៊ីន សាល់ម៉ាន ជារដ្ឋមន្ត្រីការពារប្រទេស និងព្រះអង្គម្ចាស់រាជទាយាទទីមួយ មូគ្រីន ជាឧបនាយករដ្ឋមន្ត្រីទីមួយ ។ ព្រះមហាក្សត្រទាំងអស់របស់អារ៉ាប៊ី សាអ៊ូឌីត ជាបុត្រារបស់ព្រះមហាក្សត្រស្ថាបនិកព្រះរាជាណាចក្រ គឺព្រះមហាក្សត្រអាប់ឌុលឡាហ្ស៊ីស ដែលគេក៏និយមហៅព្រះអង្គផងដែរថា អុីប សាអ៊ូដ ចាប់តាំងពីព្រះអង្គចូលទិវង្គតពីឆ្នាំ១៩៥៣មក ។
ព្រះមហាក្សត្រសាល់ម៉ាន កាន់តំណែងជាអភិបាលក្រុងរីយ៉ាដ តាំងពីទ្រង់មានវ័យ២០ព្រះវស្សា និងជារដ្ឋមន្ត្រីការពារប្រទេសក្នុងឆ្នាំ២០១១ ៕
ប្រភពពី ៖ ចន្ទ្រគ្រាស
0 ความคิดเห็น:
แสดงความคิดเห็น