សហជីពកម្មករខ្លះចាត់ទុកឆ្នាំ២០១៤ជាឆ្នាំដែលប្រឈមខ្លាំង
សហភាពការងារកម្ពុជា ដែលធ្វើការដើម្បីការពារសិទ្ធិ និងលក្ខខណ្ឌការងារប្រសើរសម្រាប់កម្មករជាសមាជិក ៩ម៉ឺននាក់ នៅខេត្តក្រុងចំនួន ១៤ បានចេញសេចក្ដីថ្លែងការណ៍របស់ខ្លួនមួយ ដោយបង្ហាញពីបញ្ហាប្រឈមជាច្រើន ថាជាសម្ពាធដ៏លំបាកមកលើសហជីព និងកម្មករក្នុងឆ្នាំ២០១៤ ខុសពីឆ្នាំ២០១៣។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការលំបាកទាំងនោះ គឺមានការទទួលរងអំពើហិង្សា និងការរំលោភផ្សេងៗលើកម្មករ៖ «ចំណុចដែលវេទនាលំបាកហ្នឹង មានដូចថា មានការចាប់ខ្លួនរហូតដល់ជាង ២៣នាក់ ហើយមានការប្រើអំពើហិង្សាជាង ១០០នាក់ ហើយមានការបញ្ឈប់រហូតដល់ជាង ៦.០០០នាក់ ហើយនិងការប្ដឹងទៅតុលាការជាង ២០ករណីហ្នឹង គឺសុទ្ធតែជារឿងថ្មី ដែលឆ្នាំមុនៗ ការចាប់ខ្លួនមិនមានទេ ហើយការបញ្ឈប់ក៏មិនច្រើនដូចហ្នឹងដែរ ហើយការប្ដឹងទៅតុលាការក៏មានតែពីរបីករណីដែរ។ នេះជាការដាក់សម្ពាធយ៉ាងខ្លាំងមកលើក្រុមចលនាសហជីព និងសមាជិក ស៊ី.អិល.ស៊ី (CLC) របស់យើង»។
ទាក់ទងនឹងបញ្ហាទូទៅ លោកបានលើកយកបញ្ហាដួលសន្លប់ និងការគ្រោះថ្នាក់របស់កម្មករដែលមានចំនួនកើនលើសឆ្នាំ២០១៣។ លោកថា មូលហេតុដែលកម្មករដួលសន្លប់ គឺបណ្ដាលមកពីការធ្វើការច្រើនម៉ោង មានកម្លាំងខ្សោយ ហើយប៉ះពាល់ជាតិគីមី ដែលគេប្រើការពារសាច់ក្រណាត់។ បន្ថែមលើសនេះទៀត ក្នុងចំនួនអ្នកគ្រោះថ្នាក់ចរាចរណ៍សរុប ៤.៧៣៧នាក់ គឺមានកម្មករចំនួន ៣.៨០០នាក់។
លោកថា មានបញ្ហាជាច្រើនទៀត ដែលខាងនិយោជក និងមន្ត្រីរដ្ឋាភិបាលឃុបឃិតគ្នាធ្វើបាបកម្មករ និងតំណាងសហជីព។
តបនឹងបញ្ហានេះ ប្រធានផ្នែកធុរកិច្ចនៃសមាគមរោងចក្រកាត់ដេរនៅកម្ពុជា លោក កាំង ម៉ូនីកា ថ្លែងថា ជាការចោទប្រកាន់ខុសការពិត ហើយបញ្ហាតុលាការចាប់កម្មករ គឺដោយសារការធ្វើបាតុកម្មខុសច្បាប់ ហិង្សា និងបំផ្លាញទ្រព្យសម្បត្តិសាធារណៈ៖ «កូដកម្ម បាតុកម្មដាច់ដោយឡែកនៅតាមរោងចក្រមួយៗ ខ្ញុំមិនដែលឃើញរដ្ឋាភិបាល ឬអាជ្ញាធរ ទៅចាប់បាននរណាម្នាក់យកទៅឃុំខ្លួនទេ ហើយកូដកម្ម បាតុកម្មទាំងអស់នោះ សុទ្ធតែជាកូដកម្ម បាតុកម្មខុសនីតិវិធីទាំងអស់។ រឿងបាតុកម្មហិង្សាដែលកើតឡើងនៅដើមឆ្នាំ បើយើងពិនិត្យមើលឃើញទាំងអស់គ្នា បាតុកម្មហ្នឹងវាមានលក្ខណៈហិង្សា ដុតបំផ្លាញទ្រព្យសម្បត្តិ។ ប៉ុន្តែយ៉ាងណាក៏ដោយ យើងឃើញហើយ រដ្ឋាភិបាលមិនទាន់បានផ្ដន្ទាទោសអ្នកណាម្នាក់ឱ្យដល់កម្រិតទេ។ យើងឃើញតែរយៈពេលប៉ុន្មានទេ លែងមកអស់វិញទៅទៀតហើយ»។
ទោះដូច្នេះក្ដី លោក អាត់ ធន់ កត់សម្គាល់នូវភាពល្អប្រសើរខ្លះដែរ បន្ទាប់ពីធ្វើសកម្មភាពតស៊ូមតិនៅក្នុងឆ្នាំ២០១៤ នោះ។ ក្នុងនោះមានដូចជា ការដំឡើងប្រាក់ខែ និងការចូលរួមរបស់សហជីពក្នុងការចរចាជាដើម៖ «ខ្ញុំឃើញថាប្រសើរហ្នឹង ដូចជាប្រាក់ឈ្នួលយើងឃើញថា បានឡើងឱ្យកម្មករហ្នឹងបានប្រសើរខ្លះ ទោះបីជាវាមិនទាន់ដល់គ្រប់អ្វីដែលយើងត្រូវការ ហើយមួយទៀត យើងឃើញថា ទោះបីជាមានអំពើហិង្សាយ៉ាងណាក៏ដោយ កម្មកររបស់យើងចូលរួមសហជីពនៅតែសស្រាក់សស្រាំដដែល។ ភាពប្រសើរមួយទៀត គឺខាងរដ្ឋាភិបាលដែលតែងចាត់ទុកសហជីពជាមនុស្សមិនឱ្យតម្លៃ ឬចរចាហ្នឹង គឺគេបានធ្វើការចរចាជាមួយយើង។ គេបានទទួលស្គាល់នូវការជជែកពិភាក្សាជាមួយយើង»។
ទន្ទឹមគ្នានេះដែរ លោក អាត់ ធន់ អំពាវនាវដល់ស្ថាប័នរដ្ឋ និងអង្គការពាក់ព័ន្ធឱ្យបន្តជួយដោះស្រាយបញ្ហាកម្មករឱ្យបានប្រសើរ ហើយរដ្ឋាភិបាលត្រូវដាក់ទោសនិយោជក និងមន្ត្រីដែលប្រព្រឹត្តខុស។ លោកសុំឱ្យតុលាការមានភាពឯករាជ កាត់ក្ដីចំពោះកម្មករ និងជនក្រីក្រដោយយុត្តិធម៌ មិនរងឥទ្ធិពលទឹកប្រាក់ និងអំណាចនយោបាយ៕
0 ความคิดเห็น:
แสดงความคิดเห็น