នចៅលោក ចាប សុផារិទ្ធ កោសរូស ឲ្យអ្នករកស៊ីដឹកទំនិញខុសច្បាប់ និងម៉ូតូគេចពន្ធមកពីស្រុកថៃ ចូលជួបសុំការយោគយល់
ខេត្តបន្ទាយមានជ័យ ៖ ក្រុមអ្នករកស៊ីដឹកជញ្ជូនទំនិញ ទាំងតូចទាំងធំ បានរអ៊ូរទាំចំពោះបែបបទ នៃការបង់លុយឲ្យមន្ត្រី និងសមត្ថកិច្ចពាក់ព័ន្ធ ដែលគ្មានតួនាទីប្រមូលលុយ បង់ចូលក្នុងហិបថវិកាជាតិ តែពួកគេមានអំណាច ចាប់ឬបង្ក្រាបការដឹកជញ្ជូនទំនិញ របស់ក្រុមឈ្មួញទាំងឡាយណា ដែលមិនបានបង់លុយ ហើយបច្ចុប្បន្ននេះ ក្រុមឈ្មួញកំពុងញាក់សាច់ ចំពោះចំណាត់ការរបស់ ប៉ូលីសសេដ្ឋកិច្ច ខេត្តបន្ទាយមានជ័យ ក្រោមបញ្ជារបស់លោក ចាប សុផារិទ្ធ ដែលកំពុងបង្កព្យុះភ្លៀង មិនដឹងជាពួកគេ ទទួលបានគោលការណ៍ ពីខាងណានោះទេ។
ប្រភពបានឲ្យដឹងថា តាំងពីលោក អាត់ ខែម វិលត្រឡប់មកកាន់តំណែងជា ស្នងការខេត្តបន្ទាយមានជ័យ គេឃើញប៉ូលីសសេដ្ឋកិច្ច ក្រោមបញ្ជារបស់លោក ចាប សុផារិទ្ធិ កាន់តែមានឱកាស ពង្រាយកូនចៅ អោយកោសរូសទារលុយ ពីឈ្មួញដឹកទំនិញ និងអ្នករត់តាក់ស៊ី តាមតែអំពើចិត្ត ដោយគ្មានខ្លាចរអែងអ្វីឡើយ ធ្វើឲ្យក្រុមអ្នករកស៊ីដឹកទំនិញ មានការក្រពុលមុខយ៉ាងខ្លាំង។ ប្រភពបានឲ្យដឹងថា នៅក្រុងប៉ោយប៉ែត កូនចៅរបស់លោក ចាប សុផារិទ្ធ តែតែដើរទារប្រាក់ និងកោសរូស ឈ្មួញដឹកទំនិញ ដោយប្រើពាក្យយ៉ាងខ្លីថា ប្រសិនបើមិនបង់លុយ ឬធ្វើក្រអឺតក្រទម គេនឹងចាប់យកទៅខេត្ត និងបញ្ជូនសំណុំរឿង ទៅតុលាការ។
ដោយសារពួកឈ្មួញ មានការភ័យខ្លាច ក៏បានបង់លុយ ទាំងទើសទាំល់ បើទោះបីជាដឹងថា នោះជាបែបបទពុករលួយ និងដើម្បីកុំឲ្យមានការរំខាន ហើយកាលពីពេលថ្មីៗនេះលោក ចាប សុផារិទ្ធ បានបញ្ចេញស្នាដៃមួយប្រាវ ធ្វើឲ្យឈ្មួញមួយចំនួនញាក់សាច់ ក៏រត់ទៅជួប សុំការយោគយល់ ឬបង់លុយជាប់ជាប្រចាំ។ ប្រភពពីឈ្មួញដឹកទំនិញ បានបង្ហើបប្រាប់ថា លោក ចាប សុផារិទ្ធ បានបង្កើតកុងត្រូលជជុះ ឲ្យកូនចៅជំនិតៗ ចុះប្រមូលលុយពីក្បាលឡាន ឬប្រដេញចាប់ ឡានដឹកទំនិញ ឲ្យចូលបង់លុយ តាមបណ្តោយផ្លូវជាតិលេខ៥ យ៉ាងប្រសេចប្រសាច។
លោក ចាប សុផារិទ្ធ មានជំនាញកេណ្ឌប្រមូល ឲ្យអ្នករកស៊ីដឹកជញ្ជូន ទំនិញមកពីស្រុកថៃ រួមមានទំនិញខុសច្បាប់ និងម៉ូតូគេចពន្ធជាដើម ចូលមកទំនាក់ទំនងបង់លុយ ឬសុំការយោគយល់ ដើម្បីចៀសផុត ពីការបង្ក្រាប។ មិនត្រឹមតែប៉ុណ្ណោះ អ្នករកស៊ីដឹកជញ្ជូន ផលកសិកម្ម និងទំនិញ ទៅលក់តាមដេប៉ូ ត្រូវបានកូនចៅ លោក ចាប សុផារិទ្ធ តម្រូវអោយបង់លុយ ក្នុងមួយរថយន្ត ១ម៉ឺនរៀល ទៅ ២ម៉ឺនរៀល ដោយគ្មានការ យោគយល់នោះទេ ដែលបញ្ហានេះ អាចធ្វើឲ្យ គណបក្សប្រជាជនកម្ពុជា ក្នុងខេត្តបន្ទាយមានជ័យ បាត់បង់ប្រជាប្រិយភាព គួរឲ្យព្រួយបារម្ភផងដែរ៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น