ឆ្លងចរន្តឆេះផ្ទះជាងជួសជុលម៉ូតូ បំផ្លាញទ្រព្យសម្បត្តិ និងលុយកាក់ អស់ទាំងស្រុង
ម្ចាស់ផ្ទះរងគ្រោះ ដែលត្រូវភ្លើងឆេះទាំងស្រុង មានឈ្មោះ ឈួន សុខកេង ភេទប្រុស អាយុ ៣១ឆ្នាំ ជាជាងជួសជុលម៉ូតូ មានប្រពន្ធទើបសម្រាលកូន បានរយៈពេល ៥ខែប៉ុណ្ណោះ ។ ចំពោះផ្ទះ ២ខ្នងទៀត ដែលនៅអមសងខាង មានម្ចាស់ផ្ទះឈ្មោះ ទឹង ហឿន ភេទប្រុស អាយុ៥៥ឆ្នាំ ប្រពន្ធ ឈ្មោះ ឆឹង សេង អាយុ ៥០ឆ្នាំ ត្រូវភ្លើងឆេះជញ្ជាំង អស់មួយចំហៀង រីឯម្ចាស់ផ្ទះម្នាក់ទៀត ជាស្ដ្រីមេម៉ាយមានឈ្មោះ ខាំ ផុន អាយុ ៧៨ឆ្នាំ ។ សមត្ថកិច្ចបានឲ្យដឹងថា អគ្គិភ័យនេះកើតឡើង ដោយសារឆ្លងចរន្ដអគ្គិសនី ដែលនៅផ្ទះបាយខាងក្រោយ។
បងស្រីម្ចាស់ផ្ទះរងគ្រោះ បានឱ្យដឹងថា នៅពេលកើតហេតុ ប្អូនប្រុសស្រីរបស់ខ្លួន កំពុងហូបបាយថ្ងៃត្រង់នៅខាងមុខ ស្រាប់តែភ្លើងឆេះ ចេញពីផ្ទះបាយខាងក្រោយ គ្រានោះម្ចាស់ផ្ទះ អត់ដឹងថា ភ្លើងឆេះនោះទេ ត្រូវបានអ្នកជិតខាងមើលឃើញ ហើយស្រែកប្រាប់ ទើបម្ចាស់ផ្ទះដឹង តែភ្លើងបានឆេះ យ៉ាងសន្ធោសន្ធៅ នៅផ្នែកខាងក្រោយ។ ពេលនោះបុរសជាប្ដី បាននាំប្រពន្ធនិងកូនខ្ចី ដែលទើបសម្រាលបាន ៥ខែ រត់ចេញមកខាងក្រៅផ្ទះ ដោយមិនបានចូលយក របស់របរមានតម្លៃ ដែលទុកក្នុងបន្ទប់នោះទេ៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น