ភ្លើងប្រចណ្ឌឆាបឆេះដល់កំរិត ទាញកាំបិតខ្វាវកាប់ប្រពន្ធ ប្រកាច់ស្លាប់នៅក្រោមផ្ទះ
ខេត្តកណ្តាល ៖ ដោយសារតែភ្លើងប្រចណ្ឌ បុរសជាប្តីបានដាច់ចិត្ត ទាញកាំបិតខ្វាវ កាប់ក្បាលប្រពន្ធ ចំនួន ២កាំបិត បណ្តាលឲ្យស្លាប់ភ្លាមៗ នៅក្នុងថ្លុកឈាម នៅនឹងកន្លែងកើតហេតុ កាលពីវេលាម៉ោង ១០និង៣០ នាទី ថ្ងៃទី២៥ ខែមករាឆ្នាំ២០១៥ ស្ថិតនៅចំណុចក្រោមផ្ទះ ជនរងគ្រោះ ក្នុងភូមិឃ្លាំងមឿងជើង ឃុំព្រែកអំពិល ស្រុកខ្សាច់កណ្តាល ខេត្តកណ្តាល។
សមត្ថកិច្ច បានឲ្យដឹងថា ជនរងគ្រោះ មានឈ្មោះ ហ៊ីង រឿន ភេទស្រី អាយុ ៥៣ឆ្នាំមុខរបរកសិករ រស់នៅភូមិឃុំ កើតហេតុ បានស្លាប់ក្នុងថ្លុកឈាម ហើយចំណែក ជនសង្ស័យឈ្មោះ រិត ជ្រឿន ភេទប្រុស អាយុ ៥៨ឆ្នាំមុខរបរ កសិករ នៅភូមិឃុំកើតហេតុ ជាមួយគ្នា ត្រូវជាប្តីបានរត់គេចខ្លួន ក្រោយពេលកាប់ប្រពន្ធស្លាប់។ កន្លងមកជនរងគ្រោះ និងជនសង្ស័យជាប្តី តែងតែមានទំនាស់ ជាមួយគ្នាជាញឹកញាប់ ដោយសារតែជនសង្ស័យជាប្តី ប្រចណ្ឌប្រពន្ធ ថា មានសាហាយស្មន់ ។
លុះដល់ថ្ងៃទី២៥ ខែមករា នៅម៉ោងកើតហេតុ ជនសង្ស័យបានជជែកគ្នា ជាមួយប្រពន្ធ នៅក្រោមផ្ទះ ពេលនោះកូនស្រីឈ្មោះ ជ្រឿន អូន បានចូលមកឃាត់ ដោយស្រែកថា ម៉ែឯង ពុកឯងម៉េចចេះតែឈ្លោះគ្នាអញ្ចឹង តែអ្នកទាំង២ មិនស្តាប់ទេ។ ភ្លាមនោះជនល្មើស បានយកកាំបិតខ្វែវ មកកាប់ជនរងគ្រោះ ត្រូវថ្ពាល់ឆ្វេង ដាច់ពីគុម្ពត្រចៀក ដល់បបូរមាត់ បណ្តាលអោយជនរងគ្រោះ ដួលលុតជង្គង់ ហើយបន្ទាប់មក ជនល្មើសកាប់ ១កាំបិតទៀត ត្រូវចំមុខពីក្បាល រហូតដល់ចង្កា ដាច់ឆ្អឹងលលាដ៍ បណ្តាលអោយស្លាប់ នៅនឹងកន្លែង។
ដោយឃើញសភាពមិនស្រួល និងខ្លាចជាប់គុក ជនសង្ស័យបានរត់គេចខ្លួន បាត់ស្រមោល បន្សល់ទុកតែសព ស្ត្រីជាប្រពន្ធដេកស្លាប់ នៅក្រោមផ្ទះ ក្នុងថ្លុកឈាម គួរឲ្យអនិច្ចា។ បច្ចុប្បន្នសាកសព ត្រូវប្រគល់ទៅឲ្យ ក្រុមគ្រួសារយកទៅ ធ្វើបុណ្យតាមប្រពៃណី ចំណែកឯជនសង្ស័យ កម្លាំងនគរបាល កំពុងតែធ្វើការស្រាវជ្រាវ ដើម្បីស្វែងរកចាប់ខ្លួន យកមកផ្តន្ទាទោស ទៅតាមផ្លូវច្បាប់៕
ប្រភពពី៖វត្តភ្នំ
0 ความคิดเห็น:
แสดงความคิดเห็น