ឡើងជែងឡាននៅពីមុខ ជ្រុលទៅបុកអ្នកជិះម៉ូតូប៉ើងដូចសី សល់តែដង្ហើមចង្រិត
រាជធានីភ្នំពេញ ៖ បុរសម្នាក់បានរងរបួសធ្ងន់ ត្រូវបានរថយន្តសង្គ្រោះ ដឹកទៅមន្ទីរពេទ្យកាល់ម៉ែតភ្លាមៗ ដោយសារតែបុរសម្នាក់ បើករថយន្តកាមរីមួយគ្រឿង ក្នុងល្បឿនលឿន ហើយគេចពី រថយន្តមួយគ្រឿង ជ្រុលបុកចំពីមុខពេញទំហឹងកាលពីវេលាម៉ោង ២២និង៤០ នាទីយប់ថ្ងៃទី២៥ ឆ្នាំ២០១៥ នៅចំណុចស្ថានីយ៍ ប្រេងឥន្ទៈតេលា តាមបណ្តោយ ផ្លូវជាតិលេខ៥កែងផ្លូវលេខ៦៨ ស្ថិតក្នុងសង្កាត់ទួលសង្កែ ខណ្ឌឫស្សីកែវ។
សាក្សីបានឲ្យដឹងថា មុនពេលកើតហេតុ គេបានឃើញយុវជនម្នាក់ ជិះម៉ូតូស១២៥ ស៊េរីឆ្នាំ២០១៤ មួយគ្រឿង ពណ៌ខ្មៅ ពាក់ស្លាកលេខ ភ្នំពេញ1CF-3884 ធ្វើដំណើរតាមបណ្តោយផ្លូវលេខ៦៨ ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៏បានបត់ឆ្វេងឆ្លងផ្លូវទៅជើង តាមផ្លូវជាតិលេខ៥ ស្រាប់តែមានរថយន្តកាមរី មួយគ្រឿងពណ៌ស្លែ ពាក់ស្លាកលេខភ្នំពេញ 2A-0807 ធ្វើដំណើរតាមបណ្តោយ ផ្លូវជាតិលេខ៥ ក្នុងទិសដៅពីជើងទៅត្បូង ក្នុងល្បឿនលឿន ហើយបានវ៉ារថយន្ត មួយគ្រឿងទៀត ធ្វើដំណើរស្របគ្នា ក៏ជ្រុលចង្កូតទៅបុកនិងម៉ូតូ ចំពីមុខពេញទំហឹង បណ្តាលឲ្យម្ចាស់ម៉ូតូ បោកខ្ទប់និងរថយន្ត រងរបួសធ្ងន់ធ្ងរ។
ក្រោយពេលកើតហេតុ ម្ចាស់រថយន្ត ត្រូវបានប្រជាពលរដ្ឋ ឃាត់បានភ្លាមៗ រីឯជនរងគ្រោះត្រូវបាន រថយន្តសាមុយ ដឹកទៅសង្គ្រោះ នៅមន្ទីរពេទ្យកាល់ម៉ែត។ បច្ចុប្បន្នរថយន្ត និងម៉ូតូដែលរងការ ខូចខាតយ៉ាងដំណំ ត្រូវបានសមត្ថកិច្ចជំនាញ យកទៅរក្សាទុក នៅការិយាល័យចរចរណ៍ជើងគោក ដើម្បីរងចាំដោះស្រាយ តាមច្បាប់៕
ប្រភពពី៖ វត្តភ្នំ
0 ความคิดเห็น:
แสดงความคิดเห็น