អីុរ៉ង់ត្រូវបង្កើតភាពស៊ាំប្រឆាំងការគាបសង្កត់ និងទណ្ឌកម្មរបស់ពួកសត្រូវ
មេដឹកនាំកំពូលអីុរ៉ង់ លោកអាយ៉ាតុលឡាហ៍ អាល់លីខាមេនី ថ្លែងកាលពីថ្ងៃទី៧ មករាថា ប្រទេសអីុរ៉ង់ត្រូវបង្កើតភាពស៊ាំទប់ទល់នឹងការគាបសង្កត់នានារបស់ពួកសត្រូវតាមរយៈការដាក់ទណ្ឌកម្ម ។លោកចោទជាសំណួរថា តើអ្នកត្រូវធ្វើបែបណា ប្រសិនបើគេដាក់លក្ខខណ្ឌនានាលើការលុបចោលបណ្តាទណ្ឌកម្មដែលធ្វើឱ្យប៉ះពាល់ដល់ភាពថ្លៃថ្នូររបស់ជាតិ ? លោកគូសបញ្ជាក់ថា យើងត្រូវរកវិធីទប់ទល់សត្រូវដែលប្រើឧបករណ៍ដាក់ទណ្ឌកម្ម ។
លោកអាលីខាមេនី បន្តថា ក្នុងឱកាសនៃការចរចានាពេលថ្មីៗនេះអំពីបញ្ហានុយក្លេអ៊ែរ បណ្តាអ្នកទទួលខុសត្រូវអាមេរិករហូតដល់ថ្លែងថា ប្រសិនបើអីុរ៉ង់ធ្វើសម្បទាននានាលើបញ្ហាថាមពលនុយក្លេអ៊ែររបស់ខ្លួននោះបណ្តាទណ្ឌកម្ម ក៏នឹងមិនលុបចោលទាំងស្រុងដែរ ។ ដោយសារការពិតនេះ តើយើងត្រូវជឿទុកចិត្តលើសត្រូវដែរឬទេ ? ខ្ញុំមិនប្រឆាំងជំទាស់នឹងការចរចាទេ ក៏ប៉ុន្តែខ្ញុំយល់ថា យើងត្រូវពឹងផ្អែកលើបណ្តាការពិត ហើយពុំមែនពឹងលើការស្រមៃនានាឡើយ។ អាស្រ័យហេតុនេះ វិធីតែមួយគត់គឺកម្រិតផលប៉ះពាល់នៃឧបាយកលរបស់សត្រូវដោយធ្វើឱ្យអីុរ៉ង់មានភាពស៊ាំចំពោះការដាក់ទណ្ឌកម្ម។ បែបនេះទើបមានន័យពិតប្រាកដថា ជាសេដ្ឋកិច្ចដែលមានភាពទប់ទល់ ។ ការអនុវត្តការជ្រើសរើសនេះជាការទទួលខុសត្រូវសំខាន់របស់បណ្តាមេដឹកនាំអីុរ៉ង់។
លោកអាលឺខាមេនី ធ្លាប់បានលើកឡើងរួចហើយទាក់ទិននឹងការកាត់បន្ថយការចំណុះរបស់ប្រទេសចំពោះប្រាក់ចំណូលពីប្រេងកាត ដោយធ្វើបែបណាឱ្យអាចពឹងផ្អែកលើខ្លួនឯងបាន គឺពឹងលើបណ្តាសក្តានុពលក្នុងស្រុក ។ ប្រសិនបើពួកសត្រូវពុំព្រមលុបចោលទណ្ឌកម្ម យើងរកវិធីកុំឱ្យការរីកចម្រើន និងសុខមាលភាពរបស់ប្រជាជនរងការប៉ះពាល់ ។
សេដ្ឋកិច្ចអីុរ៉ង់រងការដាក់ទណ្ឌកម្មពហុភាគីពីសំណាក់សហរដ្ឋអាមេរិក និងសម្ព័ន្ធមិត្តអឺរ៉ុប ដោយសារកម្មវិធីនុយក្លេអ៊ែររបស់ប្រទេសនេះ ៕
បញ្ចូលអត្ថបទ ៖ ចន្ទ្រគ្រាស
0 ความคิดเห็น:
แสดงความคิดเห็น