ពលរដ្ឋជិត២០០នាក់មកពី៨សហគមន៍ចូលខ្លួនបំភ្លឺរឿងទំនាស់ដីធ្លី
ខេត្តសៀមរាប ៖ តុលាការខេត្តសៀមរាបបានកោះហៅតំណាងសហគមន៏ស្គន់ឲ្យចូលខ្លួនបំភ្លឺពីរឿងទំនាស់ដីធ្លី ប៉ុន្តែក្រុមអ្នកភូមិប្រមាណជិត២០០នាក់ មកពី៨សហគមន៏ ក្នុងឃុំចំនួនពីរនៃស្រុកបន្ទាយស្រី ខេត្តសៀមរាប បានលើកគ្នាមកឈរត្រៀបត្រាពាសពេញមុខតុលាការ បំណងតវ៉ាកុំឲ្យតុលាការឃុំខ្លួនតំណាងរបស់ពួកគាត់ បន្ទាប់ពីតុលាការកោះហៅឲ្យចូលខ្លួន។
ហេតុការណ៍ពលរដ្ឋមកតវ៉ានៅមុខតុលាការនោះបានធ្វើឡើងកាលពីរសៀលថ្ងៃទី៨ មករា ២០១៥ ស្ថិតក្នុងភូមិជ្រាវ សង្កាត់ជ្រាវ ក្រុងសៀមរាប។ តំណាងក្រុមអ្នកភូមិ លោក ចន្ទ័ រិទ្ធ ភេទប្រុស អាយុ៥៥ឆ្នាំ រស់នៅភូមិចំបក់បីដើម ឃុំត្បែង ស្រុកបន្ទាយស្រី និងជាតំណាងពលរដ្ឋក្នុងរឿងទំនាស់ដីធ្លីផងនោះ បានត្រូវចៅក្រមស៊ើបសួរសាលាដំបូងខេត្ត លោកសំ ប៊ុនពៅ ចេញដីកាបង្គាប់ឲ្យចូលខ្លួនក្រោមការចោទប្រកាន់ពីបទលួច(លួចគោ) ដែលបានប្រព្រឹត្ត កាលពីថ្ងៃទី៤ សីហា ២០១៤ នៅក្នុងភូមិត្បែងខាងលិច ឃុំត្បែង ស្រុកបន្ទាយស្រី ខេត្តសៀមរាប។
ក្រុមអ្នកភូមិដែលលើកគ្នាមកលើកទឹកចិត្តតំណាងពលរដ្ឋចំនួនជិត២០០នាក់នោះបាននិយាយថា ពួកគាត់មកពីសហគមន៍ចំនួន៨ក្នុងឃុំត្បែង ស្រុកបន្ទាយស្រីខេត្តសៀមរាប ហើយពួកគាត់មកនេះក្នុងបំណងតវ៉ានិងរារាំងដល់ស្ថាប័នតុលាការ ប្រសិនបើចៅក្រមស៊ើបសួរសម្រេចឃុំខ្លួនលោកចន្ទ័ រិទ្ធ មែននោះ។ ក្រុមអ្នកភូមិបន្តថា ប្រសិនបើពួកគាត់មិនឃើញតំណាងចេញមកទេនោះ ពួកគាត់ក៏មិនវិលទៅលំនៅឋានវិញទេ បើឈ្មោះចន្ទ័ រិទ្ធ មិនបានវិលទៅជាមួយគ្នា ពីព្រោះគាត់មិនបានប្រព្រឹត្តិដូចការចោទប្រកាន់របស់ដើមបណ្តឹងនោះឡើយ។
ស្ត្រីឈ្មោះ ឃី ភីរម្យ ដែលជាប្រពន្ធលោកចន្ទ័ រិទ្ធ បាននិយាយនៅចំពោះមុខតុលាការថា រូបគាត់មានការព្រួយបារម្ភពីការឃុំខ្លួនប្តីរបស់គាត់ណាស់ ក្រៅពីរូបគាត់ និងក្រុមអ្នកភូមិក៏ដូចគ្នាដែរ ទើបពួកគាត់នាំគ្នាមកឈរត្រៀបត្រាពេញមុខតុលាការដើម្បីតវ៉ាបែបនេះ។
លោក សួស ណារិន អ្នកឃ្លាំមើលសិទ្ធិមនុស្សនៃសមាគមអាដហុកខេត្តសៀមរាបបានមានប្រសាសន៍នៅរសៀលថ្ងៃទី០៩ មករាថា ករណីនេះបើតាមលោកទទួលបាន ជនសង្ស័យឈ្មោះ ចន្ទ័ រិទ្ធ ត្រូវបានតុលាការឲ្យនៅក្រៅឃុំបណ្តោះអាសន្ន ប៉ុន្តែស្ថិតនៅក្រោមការស៊ើបអង្គេតរបស់តុលាការ៕
បញ្ចូលអត្ថបទ ៖ ផ្កាយព្រឹក
0 ความคิดเห็น:
แสดงความคิดเห็น