ការចរចាគ្នាផ្លូវការដំបូងអាមេរិក-គុយបាធ្វើនាថ្ងៃទី21 និង 22 មករា
ក្រសួងការបរទេសអាមេរិករាយការណ៍កាលពីថ្ងៃទី៨ មករាថា សហរដ្ឋអាមេរិក និងគុយបា នឹងធ្វើការចរចាផ្លូវការដំបូងចាប់ពីថ្ងៃទី២១ មករា ទៅនៅទីក្រុងឡាហាវ៉ាន សំដៅធ្វើឱ្យមានប្រក្រតីភាពឡើងវិញនៃទំនាក់ទំនងការទូតរវាងប្រទេសទាំង២ ។
លោកស្រី JENNIFER PSAKI អ្នកនាំពាក្យក្រសួងការបរទេសអាមេរិក គូសបញ្ជាក់ថា អនុរដ្ឋមន្ត្រីការបរទេសអាមេរិកទទួលបន្ទុកកិច្ចការអាមេរិកឡាទីន លោកស្រី ROBERTA JACOBSON នឹងទៅកាន់រដ្ឋធានីគុយបា នាថ្ងៃទី២១ និង២២ មករា ដើម្បីធ្វើការចរចាគ្នានោះ ។
លោកស្រី PSAKI បញ្ជាក់ថា ការចរចានោះប្រព្រឹត្តទៅខាងក្រៅ ការពិភាក្សាគ្នាដែលប្រទេសទាំង២ តែងធ្វើជាទៀងទាត់ស្តីពីបញ្ហាអន្តោប្រវេសន៍ ។ នេះជាការចរចាមួយជាមួយរដ្ឋាភិបាលគុយបាស្តីការធ្វើឱ្យមានប្រក្រតីភាពឡើងវិញនៃទំនាក់ទំនងការទូត ។
ការចរចានោះដែលជាគោលការណ៍សម្រេចធ្វើក្រោយការប្រកាសកាលពីថ្ងៃទី១៧ ធ្នូ ពីការខិតចូលជិតគ្នាជាប្រវត្តិសាស្ត្ររវាងប្រទេសទាំង២ នឹងជាការចរចាគ្នាផ្លូវការលើកដំបូង បន្ទាប់ពីរយៈពេល១៨ខែនៃការចរចាគ្នាជាសម្ងាត់រវាងក្រុងវ៉ាស៊ីនតោន និងក្រុងឡាហាវ៉ានក្រោមការជួយជ្រោមជ្រែងរបស់បុរីវ៉ាទីកង់ និងប្រទេសកាណាដា ។
រដ្ឋាភិបាលទាំងពីរត្រូវពិភាក្សាគ្នាជាពិសេសពីការបើកស្ថានទូត ទោះបីជាប្រទេសទាំងពីរមានរួចហើយផ្នែកការពារផលប្រយោជន៍របស់ខ្លួនក្តី ។
អាមេរិកបានដាក់ការហុ៊ុមព័ទ្ធសេដ្ឋកិច្ចប្រឆាំងគុយបា ចាប់តាំងពីជាងកន្លះសតវត្សមកហើយ ។
ចំណែកអាជ្ញាធរគុយបាដែលសន្យាកាលពីខែធ្នូ ដោះលែងអ្នកទោសនយោបាយ៥៣នាក់ក្នុងក្របខ័ណ្ឌកិច្ចព្រមព្រៀង ធ្វើឱ្យមានប្រក្រតីភាពឡើងវិញនៃទំនាក់ទំនងជាមួយសហរដ្ឋអាមេរិកនោះបានដោះលែងអ្នកទោសនយោបាយ១១នាក់ទៀតរយៈពេល២៤ម៉ោងចុងក្រោយនេះ ៕
បញ្ចូលអត្ថបទ ៖ ចន្ទ្រគ្រាស
0 ความคิดเห็น:
แสดงความคิดเห็น