លោក ចុក ងួន មានអំណាចចាត់តាំងកូនចៅគ្រប់ច្រក ចាំប្រដេញទារលុយ ពីឡានដឹកឈើយកទៅបង់ឲ្យ មេយោធាខេត្តក្រចេះ
ខេត្តក្រចេះ ៖ យ៉ាងហោចណាស់ បុរសពីរនាក់ ដែលគេដឹងថា ជាអ្នកប្រមូលលុយ ពីរថយន្តដឹកឈើគ្រប់ប្រភេទ នៅតាមដងផ្លូវ យកទៅឲ្យមន្ត្រីយោធា ខេត្តក្រចេះ បានរងរបួសធ្ងន់ ខណៈដែលពួកគេ បានបើករថយន្ត កាមរីគូទហើម ប្រដេញរថយន្តសាំយ៉ុង គេសង្ស័យថា មានផ្ទុកឈើប្រណិត ហើយបានជ្រុលទៅបុក គោយន្តកន្ត្រៃ ដែលកំពុងធ្វើដំណើរស្របទិសគ្នា ពីក្រោយយ៉ាងពេញទំហឹង កាលពីយប់ថ្ងៃទី១៧ ខែមករា ឆ្នាំ២០១៥ នៅលើកំណាត់ផ្លូវជាតិលេខ៧ ក្នុងភូមិកំបោរ ឃុំគោលាប់ ស្រុកចិត្របុរី ខេត្តក្រចេះ។
បុរសទាំង ២នាក់ ត្រូវគេស្គាល់ថា ម្នាក់ឈ្មោះ គង់ វិបុល ហៅ ជ្រូក អាយុ ២១ឆ្នាំ ជាអ្នកបើកបរ រស់នៅភូមិគោលាប់ ឃុំគោលាប់ ស្រុកចិត្របុរី ខេត្តក្រចេះ រងរបួសធ្ងន់ ត្រូវបាននាំទៅសង្គ្រោះ នៅមន្ទីរពេទ្របង្អែកខេត្ត និងអ្នករួមដំណើរ ម្នាក់ទៀតឈ្មោះ សៀវ គឹមឡេង ហៅយួន អាយុ ២៧ឆ្នាំ មានទៅលំនៅ ភូមិផ្សារដើមគរ ខណ្ឌទួកគោក រាជធានីភ្នំពេញ រងរបួសធ្ងន់ ត្រូវបាននាំទៅសង្គ្រោះ នៅមន្ទីរពេទ្យ ក្នុងប្រទេសវៀតណាម។ ចំណែកអ្នកបើកបរ គោយន្តកន្ត្រៃឈ្មោះ តុល លាភ អាយុ ៤២ឆ្នាំ រស់នៅភូមិបន្ទាយ ឃុំគោលាប់ ស្រុកចិត្របុរី រងរបួសស្រាល។
សមត្ថកិច្ចប៉ូលីស ស្រុកចិត្របុរី បានឱ្យដឹងថា នៅយប់កើតហេតុ បុរសរងគ្រោះ បានបើករថយន្ត ម៉ាកកាមរីគូទហើម ពណ៌ស្លែចាស់ ពាក់ស្លាកលេខ ភ្នំពេញ 2C-5054 ក្នុងទិសដៅពីលិចទៅកើត ក្នុងល្បឿនលឿនដូចហោះ ដោយប្រដេញតាម រថយន្តសាំយ៉ុងពណ៌សរ មួយគ្រឿង ដោយមានការសង្ស័យថា រថយន្តនោះដឹកឈើ និងភ្លេចចូលបង់លុយ លុះមកដល់ចំនុចកើតហេតុ ក៏បានទៅបុក គោយន្តកន្ត្រៃពីក្រោយពេញទំហឹង បណ្តាលឱ្យគោយន្តកន្ត្រៃ ផ្លោងដាច់ជាច្រើនកំណាត់ ហើយចំណែករថយន្តបង្ក ខូចខាតស្ទើរទាំងស្រុង។
សេចក្តីរាយការណ៍បានឱ្យដឹងថា បុរសជាអ្នកបើកបររថយន្តបង្ក ឈ្មោះ គង់ វិបុល ហៅ ជ្រូក និងម្នាក់ទៀតឈ្មោះ សៀវ គឹមឡេង ហៅ យួន មិនមានតួនាទីក្នុងការ ចុះចាប់បង្ក្រាប រថយន្តដឹកឈើនោះទេ តែគេបានអះអាងថា បុរសទាំងពីរនាក់នេះ គឺត្រូវមន្ត្រីយោធាឈ្មោះ ចុក ងួន នៅក្នុងតំបន់ ប្រតិបត្តិការសឹករងក្រចេះ យកមកប្រើឲ្យជួយ ធ្វើការងារសេដ្ឋកិច្ច ប្រដេញកាក់ឡានដឹកឈើ និងរាប់ក្បាលឡាន យកលុយតែប៉ុណ្ណោះ។
ប្រភពបានឱ្យដឹងទៀតថា មន្ត្រីយោធានៅក្នុង តំបន់ប្រតិបត្តិការសឹករងក្រចេះ ឈ្មោះ ចុក ងួន គឺជាមនុស្សម្នាក់ ដែលថ្នាក់លើចាត់តាំងឲ្យ ធ្វើការងារសេដ្ឋកិច្ច យកទៅបង់ជូនថ្នាក់លើ ហើយសព្វថ្ងៃនេះ គេបានដាក់ពង្រាយកូនចៅ តាមដងផ្លូវ ដែលគេហៅថាកុងត្រូលជជុះ ដើម្បីចាំរាប់ក្បាលឡាន ដឹកឈើយកលុយ។ មិនតែប៉ុណ្ណោះ គេសង្កេតឃើញមានមន្ត្រីយោធា នៃតំបន់ ប្រតិបត្តការសឹករងក្រចេះ ជាច្រើននាក់ ត្រូវបានគេដាក់ពង្រាយ តាមច្រកសំខាន់ៗ ក្នុងការឃ្លាំមើល និងចុះប្រមូលលុយ ពីក្រុមឈ្មួញអ្នករកស៊ី ដឹកឈើគ្រប់ប្រភេទ យកមកបែងចែកជូនថ្នាក់លើ៕
0 ความคิดเห็น:
แสดงความคิดเห็น