គ្រួសារជនរងគ្រោះធ្លាក់យន្តហោះ AirAsia អាចទទួលបានប្រាក់សំណង ២៤ ០០០ដុល្លារ
គ្រួសារជនរងគ្រោះដែលបានស្លាប់ក្នុងឧបទ្ទវហេតុធ្លាក់យន្តហោះ AirAsia ត្រូវបានគេអះអាងថា អាចទទួលបានសំណងជាទឹកប្រាក់ប្រមាណ ២៤ ០០០ដុល្លារក្នុងជនរងគ្រោះម្នាក់។ នេះបើយោងតាមលិខិតផ្លូវការមួយបានធ្វើឡើងដោយក្រុមហ៊ុនអាកាសចរណ៍មួយនេះ។
នៅក្នុងលិខិតរបស់ក្រុមហ៊ុននេះបានសង្កត់ធ្ងន់ថា ប្រាក់សំណងនេះធ្វើឡើងសម្រាប់ផ្តល់ជូនទុកធ្វើជាដំណោះស្រាយបញ្ហាហិរញ្ញវត្ថុណាមួយរបស់គ្រួសារជនរងគ្រោះក្នុងកំឡុងពេលប្រតិបត្តិការរុករកសាកសពដែលបានស្លាប់ក្នុងហេតុការណ៍ធ្លាក់យន្តហោះចូលទៅក្នុងដែនសមុទ្រ ជ្វា កាលពីថ្ងៃទី ២៨ ខែធ្នូកន្លងទៅនេះ។
ទោះបីជាបែបនេះក្តី រហូតមកទល់នឹងពេលនេះ គ្មានសាច់ញាតិជនរងគ្រោះណាមួយក្នុងចំណោមជនរងគ្រោះទាំង ១៦២ ដែលបានជិះនៅលើយន្តហោះនេះ យល់ព្រមចុះហត្ថលេខាទទួលយកសំណងនេះនៅឡើយទេ។
ជុំវិញបញ្ហានេះ យោងតាមសារព័ត៌មាន Wall Street Journal ដែលបានដកស្រង់សម្ដីនាយកប្រតិបត្តិក្រុមហ៊ុន AirAsia លោក Tony Fernandes បានបញ្ជាក់ថា ក្រុមហ៊ុនរបស់លោកអាចនឹងផ្តល់ជំនួញហិរញ្ញវត្ថុបន្ថែមក្រៅពីសំណងនេះនៅពេលខាងមុខសម្រាប់គ្រួសារជនរងគ្រោះទាំងនេះ។
ក្នុងប្រតិបត្តិការរុករកឈានមកដល់ថ្ងៃទី១០ នេះ សាកសពជនរងគ្រោះត្រឹមតែ ៣៧ នាក់ប៉ុណ្ណោះក្នុងចំណោមជនរងគ្រោះទាំង ១៦២ នាក់ជិះនៅលើយន្តហោះ ត្រូវបានស្រង់បាន ខណៈដែលបំណែកយន្តហោះរួមមាន ទ្វា បង្អួច កៅអីអង្គុយ និងកន្ទុយយន្តហោះមួយចំនួនទៀត កំពុងត្រូវបានក្រុមអ្នករុករក បានរកឃើញជាបន្តបន្ទាប់៕
ប្រែសម្រួល៖ ខេវិន
0 ความคิดเห็น:
แสดงความคิดเห็น