ទណ្ឌកម្មនៃពលករខ្មែរនៅតែមានជាបន្តបន្ទាប់ បើក្រុមហ៊ុនឯកជននាំពលករឆ្លងដែនដោយស្របច្បាប់នោះ យកពួកគាត់ធ្វើជាទំនិញសំរាប់លក់ដូរតទៅទៀត
ប៉ោយប៉ែត៖ កាលពីព្រឹកថ្ងៃទី០១ ខែមករា ឆ្នាំ២០១៣ មានករណីពលករខ្មែរដែលបំរុងនឹងឆ្លងដែនទៅធ្វើការនៅប្រទេសថៃចំនួន ៨ នាក់ មានស្រុកកំណើតនៅកោះធំ ស្រុកស្អាង។ បើតាមការឱ្យដឹងប្រភពពីកម្លាំងពលករទាំងនោះ បានរៀបរាប់ប្រាប់ភ្នាក់ងារ យកព័ត៌មានយើងឱ្យដឹងថា ពួកគាត់ជាពលកររបស់ក្រុមហ៊ុន ស៊ី ឌី អឹម ដែលមានអាស័យដ្ឋានផ្ទះលេខ ៦ បេ ភូមិឬស្សី សង្កាត់ ស្ទឹងមានជ័យ ខណ្ឌមានជឃ័យ រាជធានីភ្នំពេញ។
ក្រុមកម្មករទាំង៨នាក់នោះ មានទឹកមុខហាក់អស់សង្ឃឹម ចំពោះខាងភាគីក្រុមខាងលើ ដោយពួកគាត់បានអង្គុយរង់ចាំមេការក្រុមហ៊ុននាំពួកគាត់ចូលទៅប្រទេសថៃ នៅចំណុចរង្វង់មូលក្រុងប៉ោយប៉ែត ខេត្តបន្ទាយមានជ័យ ក្នុងនោះ ពួកគាត់បានបង្ហើបពីប្រវត្តិរឿងរ៉ាវដែលពួកគាត់បានបង់ប្រាក់ឱ្យក្រុមហ៊ុន ស៊ី ឌី អឹម ប្រាប់មកអ្នកយកព័ត៌មានថា ពួកគាត់ត្រូវបាន បង់ប្រាក់ឱ្យក្រុមហ៊ុនថ្លៃធ្វើលិខិតឆ្លងដែនចំនួន ១៥០ ដុល្លារសហរដ្ឋអាមេរិកក្នុងម្នាក់ៗ ហើយពួកគាត់នៅជំពាក់ប្រាក់ក្រុមហ៊ុន ១៨០០០ ប្រាក់បាតទៀត សំរាប់ម្នាក់ៗ ក្រោយពេលបានចូលធ្វើការនៅក្នុងប្រទេសថៃហើយ។ ដោយឡែកមេការតម្រូវឱ្យពលករម្នាក់ត្រូវតែបង់ប្រាក់ ឱ្យខ្លួនចំនួន ៣២០០ ប្រាក់បាតទៀត ថ្លៃសេវាកម្មបំពេញបែបបទ ចូលទៅប្រទេសថៃនោះ សរុបឱ្យខ្លីទៅ ដើម្បីឱ្យពលករខ្មែរបានចូលទៅធ្វើការនៅប្រទេសថៃដោយស្របច្បាប់នោះ ពលករម្នាក់ត្រូវបង់ប្រាក់ឱ្យក្រុមហ៊ុន ស៊ីឌីអឹម នេះ មិនក្រោមពី ២៥៧០០ ប្រាក់ បាតថៃនោះទេ។
កត្តាទាំងនេះ វាបានផ្ទុយនឹងប្រសាសន៏ដ៏ថ្លៃថ្លារបស់សម្តេចអគ្គមហាសេនាបតិតេជោ ហ៊ុន សែន នាយរដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានថ្លែងកាលពីពេលថ្មីនេះថា ពលករខ្មែរ មិនត្រូវបានបង់ប្រាក់ដ៏ច្រើនថ្លៃធ្វើលិខិតឆ្លងដែន ដើម្បីឱ្យខ្លួនក្លាយជាពលករស្របច្បាប់នោះទេ ប៉ុន្តែពេលនេះ ភាគីខាងក្រុមហ៊ុននាំពលករខ្មែរទៅធ្វើការដោយស្របច្បាប់ឈ្មោះ ស៊ីឌីអឹម ហេតុអីបានជាត្រូវឱ្យពលករបង់ប្រាក់ឱ្យខាងភាគីក្រុមហ៊ុន រហូតដល់ទៅជិត ៨៥៦ ប្រាក់ដុល្លារសហរដ្ឋអាមេរិកសម្រាប់ពលករម្នាក់។
នៅវេលាម៉ោង ៣ និង ៥០ នាទី ល្ងាចថ្ងៃទី១ ខែមករា ឆ្នាំ២០១៣ នេះដែរ ភ្នាក់ងារយកព័ត៌មានយើងបានជូបបុរសម្នាក់តាមទូស័ព្ទ ដែលបុរសរូបនោះ បានអះអាងប្រាប់ថា ខ្លួនគេជាប្អូនប្រុសបង្កើតម្ចាស់ក្រុមហ៊ុន ស៊ីឌីអឹម ត្រេនឌឹង មែនផ៉ាវវរ័ខូអិលធីឌី បុរសរូបនោះប្រើប្រាស់ទូរសព្ទ័លេខ ០៩៧ ៨០៣៣៣១៥ ហើយបាននិយាយបដិសេធថា ថ្ងៃនេះខាងក្រុមហ៊ុន ស៊ីឌីអឹម របស់ខ្លួន មិនបាននាំពលករចូលទៅធ្វើការនៅប្រទេសថៃនោះទេ។ ជាងនេះទៅទៀត រាល់ប្រាក់ដែលក្រុមហ៊ុនតម្រូវឱ្យពលករបង់នោះ គឺជាប្រាក់ថ្លៃ សេវាកម្មរបស់ក្រុមហ៊ុនដែលបានសហការធ្វើគ្នា ជាមួយរដ្ឋមន្ត្រីក្រសួងការងារ និងក្រសួងពាណិជ្ជកម្មតែប៉ុណ្ណោះ។ បរុសនោះបានបន្តប្រាប់ហេតុផលទៀតថា ក្រុមហ៊ុនមានតួនាទីនាំពលករទៅធ្វើការនៅក្រៅប្រទេសដោយស្របច្បាប់ ប៉ុន្តែ រឿងថា ក្រុមហ៊ុនជំរិតកពលករនោះ គឺគ្មានទេ ព្រោះប្រាក់ខាងលើគឺជាសេវាកម្មរបស់ក្រុមហ៊ុន លោកបានបន្តទៀតថា បើចង់ដឹងរឿង សូមលោក អ្នកយកព័ត៌មានមកជូបខ្ញុំនៅភ្នំពេញ ហើយពាក់ព័ន្ធនឹងពលករចំនួនប្រាំបីនាក់ខាងលើនេះ តំណាងភាគីក្រុមហ៊ុន ស៊ីឌីអឹម រូបនោះ បានត្រឹមតែឆ្លើយប្រាប់ថា ថ្ងៃនេះជាថ្ងៃឈប់សំរាករបស់ខ្ញុំ ហើយខ្ញុំមិនធ្វើការទេ។
ដោយឡែកកម្មករម្នាក់ក្នុងចំណោមកម្មករទាំង៨នាក់ ឈ្មោះ ឡឹង លៃ ហាង បាននិយាយប្រាប់ថា ពេលនេះ ពួកគាត់មិនមានអ្វីនៅសេសសល់ទៀតទេ ព្រោះដីស្រែចំការបានលក់បញ្ចាំយកប្រាក់មកបង់ឱ្យក្រុមហ៊ុនអស់ហើយៗ ការងារ ដែលត្រូវធ្វើនៅប្រទេសថៃនោះ មិនដឹងជាការងារប្រភេទអ្វីនោះទេ ដឹងត្រឹមតែមេការក្រុមហ៊ុនគេប្រាប់ថា ធ្វើការនៅប្រទេសថៃ បានទទួលប្រាក់ខែច្រើនចាប់ពី ៩០០០ ប្រាក់បាតថៃឡើងទៅក្នុង១ខែ។ ចំណែកកម្មករម្នាក់ទៀតបានប្រាប់ឱ្យដឹងថា ខ្លួនគាត់ធ្លាប់បានទៅធ្វើការម្តងរួចមកហើយ នៅប្រទេសថៃជាមួយក្រុមហ៊ុននាំពលករស៊ីឌីអឹមនេះ កាលណោះពួកគាត់មិនបានទទួលប្រាក់ ខែទេ គឺបានត្រឹមតែធ្វើការគិតជាថ្ងៃ មួយថ្ងៃ ១៧០ ប្រាក់បាតថៃ ថ្លៃអាហារដោះស្រាយដោយខ្លួនឯង រឺឯបន្ទប់ស្នាក់អាស្រ័យ គឺខាងក្រុមហ៊ុនគេ មិនគិតប្រាក់ទេ។ កម្មករម្នាក់នោះ បានឱ្យដឹងបន្ថែមទៀតថា កាលណោះពួកគាត់ បាននាំគ្នារត់ចេញពីការងារ ព្រោះស៊ូមិនបាន ពោលគីខាងក្រុមហ៊ុនបាននិយាយថា ការងារដែលត្រូវធ្វើនោះ ជាការងារប្រភេទរោងចក្រផលិតគ្រឿងអេឡិចត្រូនិច ប៉ុន្តែពេលទៅដល់ជាក់ស្តែង គឺធ្វើការខុសនិងកិច្ចសន្យា កម្មករដដែលបានបន្តលើកឡើងទៀតថា រាល់លិខិតឆ្លងដែនដែលពួកកម្មករមាននោះ គឺត្រូវមេការក្រុមហ៊ុន ដកហូតយកអស់មិនទុកឱ្យកម្មករកាន់នៅជាប់នឹងខ្លួននោះឡើយ នេះជាការរំលោភមួយដ៏ធំសំរាប់ពលករខ្មែរ ដោយពួកគេនិយាយថា បើទុកលិខិតឆ្លងដែននេះនៅនឹងដៃកម្មករ នោះ បើមានករណីបាត់បង់ទៅ គឺគ្មានអ្នកទទួលខុសត្រូវទេ ដូច្នេះបានជាគេត្រូវដកហូតលិខិតឆ្លងដែនពីពលករទុក។
បើទោះជាបែណាក្តី ពាក់ព័ន្ធនឹងរឿងក្រុមហ៊ុននាំពលករទៅធ្វើការនៅក្រៅប្រទេសដោយស្របច្បាប់នោះ ភ្នាក់ងារយកព័ត៌មាន យើង នឹងព្យាយាមធ្វើការតាមដានរឿងនេះជាបន្តទៀត ព្រោះថា រាល់ប្រភពផ្សេងៗដែលយើងធ្វើការចុះផ្សាយនេះ គឺភ្នាក់ងារយើង បានមកពីពលករតែប៉ុណ្ណោះ ជាក់ស្តែងកន្លងមកនេះ មានក្រុមហ៊ុនមួយដែលមានឈ្មោះថា មីនីបៀ គឺជាក្រុមហ៊ុនមួយ ដែលបាននាំពលករកម្ពុជាដ៏ច្រើនទៅធ្វើការនៅប្រទេសថៃ ហើយក្រុមហ៊ុននេះ គេមានផែនការមួយដ៏ល្អសំរាប់ជួយដល់កម្លាំងពលករ ដូចជារាល់ពលករដែលបានស្ម័គ្រចិត្តទៅធ្វើការជាមួយក្រុមហ៊ុន គឺខាងក្រុមហ៊ុនចេញថ្លៃសេវាកម្មធ្វើលិខិតឆ្លងដែនឱ្យកម្មករ ដោយមិន បាច់អស់ប្រាក់ទៀតផង។ ជាងនេះទៅទៀត រាល់កម្មករដែលមានលិខិតឆ្លងដែន គឺខាងក្រុមហ៊ុន ត្រូវបានដកហូតពីកម្មករទេ ប៉ុន្តែសំរាប់ក្រុមហ៊ុនមួយចំនួនវិញ គឺពិតជាធ្វើការហាក់មិនទាន់ត្រឹមត្រូវនឹងច្បាប់ប្រទេសជាតិនៅឡើយ ដូច្នេះ ដើម្បីឱ្យពលករខ្មែរ យើងមានតម្លាភាព ក្នុងការចេញទៅរកការងារធ្វើដោយស្របច្បាប់នៅក្រៅប្រទេស គួរតែអស់លោកឈប់ប្រើយន្តការយកពលករខ្មែរធ្វើជា ទំនិញសំរាប់លក់តទៅទៀតអី ព្រោះសម័យនេះ គឺជាសម័យសម្តេចតេជោហើយ៕ ដោយ៖ ជាយដែន
0 ความคิดเห็น:
แสดงความคิดเห็น