កីឡាករឌីហ្គេលអាចជួបកេស្ល៊័រ ប្រសិនខាលហ្វ្រច់ព្រមដាក់ឱ្យទំនេរខ្សែក្រវាត់ IBF
កីឡាករប្រដាល់អង់គ្លេស ជេម ឌីហ្គេល អាចជ្រើសយកការជួបជាមួយកីឡាករដាណឺម៉ាក មីកគែល កេស្ល៊័រ ឬកីឡាករមិត្តរួមជាតិរ៉ុកគីហ្វៀលឌីង សម្រាប់ការប្រកួតក្នុងឆ្នាំថ្មីរបស់ខ្លួន ប្រសិនជាកីឡាករខាល ហ្វ្រច់ ដាក់ឱ្យទំនេរខ្សែក្រវាត់ស្ថាប័ន IBF ។ឌីហ្គេល វ័យ២៨ឆ្នាំ បច្ចុប្បន្នកំពុងហ្វឹកហាត់យ៉ាងមមាញឹក ខណៈរូបគេនឹងត្រូវឡើងសង្វៀនក្នុងពេលឆាប់ៗខាងមុខនេះ ។ រូបគេគឺជាអ្នកដែលទទួលបានសិទ្ធិឡើងប្រកួតដណ្តើមខ្សែក្រវាត់ស្ថាប័ន IBF ពីខាល ហ្វ្រច់ តាមអាណត្តិកំណត់ ។
យ៉ាងណាក៏ដោយ ហ្វ្រច់ វ័យ៣៧ឆ្នាំហាក់រារែកមិនចង់ប្រកួតជាមួយកីឡាករឌីហ្គេលនោះឡើយ ដោយគេសំអាងថា ជាការប្រកួតដែលគ្មានការទាក់ទាញ និងចំណាប់អារម្មណ៍ច្រើនពីអ្នកគាំទ្រ ។ ផ្ទុយពីនេះ ហ្វ្រច់ ប្រាថ្នាចង់បានការប្រកួតនៅអាមេរិក ។ កីឡាករអង់គ្លេសរូបនេះដែលបច្ចុប្បន្នគ្រងខ្សែក្រវាត់ស្ថាប័ន WBA ផងដែរនោះបាននិយាយថា រូបគេនឹងចូលនិវត្តន៍ ប្រសិនការជួបគ្នាជាមួយ Julio Cesar Chavez Jr នៅក្រុងឡាសវេហ្គាស មិនអាចលេចចេញជារូបរាង ។
ចំណែកលោក Jim McDonenell គ្រូបង្ហាត់កីឡាករឌីហ្គេល និយាយថា ៖ «ខ្ញុំបានឮពីការលើកយកឈ្មោះកីឡាករហ្វៀលឌីង ម្នាក់ផងដែរ។ គេស្ថិតនៅចំណាត់ថ្នាក់លេខ៩ ក្នុងស្ថាប័ន IBF ហើយកីឡាករម្នាក់ទៀតដែលខ្ញុំបានឮឈ្មោះដែរនោះគឺ Andre Dirrell ឯអ្នកទី៣ គឺកីឡាករមីកគែល កេស្ល៊័រ ។ ប៉ុន្តែ កីឡាករដាណឺម៉ាករូបនេះគ្មានចំណាត់ថ្នាក់ក្នុងស្ថាប័ន IBF ទេ។ យ៉ាងណាក៏ដោយ ខ្ញុំសូមជម្រាបថា ឌីហ្គេល នឹងត្រូវតែឡើងសង្វៀនដោយខានមិនបានខណៈការហ្វឹកហាត់បានបញ្ចប់ ។ កូនសិស្សរបស់ខ្ញុំចង់ប្រកួតជាមួយ ខាល ហ្វ្រច់ ជាងអ្នកណាទាំងអស់ ។ ខ្ញុំយល់ថា រវាងជំនួបពួកគេនឹងពិតជាអាចទាក់ទាញបានអ្នកគាំទ្រយ៉ាងច្រើន ។ ឥឡូវនេះ អ្វីដែលនៅសេសសល់គឺស្ថិតនៅលើការសម្រេចចិត្តរបស់ ខាល ហ្វ្រច់» ។
សូមបញ្ជាក់ថា ឌីហ្គេល ដែលជាម្ចាស់មេដាយមាសអូឡាំពិកក្រុងប៉េកាំងឆ្នាំ២០០៨ផងនោះ ធ្លាប់ប្រកួតបាន២១លើក ក្នុងនោះចាញ់១លើក និងផ្តួលគូប្រកួតឱ្យសន្លប់បាន១៤លើក។ ការប្រកួតចុងក្រោយរបស់គេនៅទីក្រុងលីវើភូល កាលពីថ្ងៃទី២២ វិច្ឆិកា ឆ្នាំ២០១៤ ផ្តួលកីឡាករម៉ិកស៊ិក Marco Antonio Peribán ឱ្យសន្លប់ក្នុងទឹកទី៣ ៕
បញ្ចូលអត្ថបទ ៖ ចន្ទ្រគ្រាស
0 ความคิดเห็น:
แสดงความคิดเห็น